RFL
Kigali

Carlo Ancelotti yatunguwe no kwirukanwa muri Napoli nyuma yo kuyihesha itike muri Champions League

Yanditswe na: SAFARI Garcon
Taliki:11/12/2019 10:37
0


Ikipe ya Napoli yirukanye uwari umutoza wayo Carlo Ancelotti nta n'amasaha atatu ashize amaze kuyifasha kugera muri 1/8 mu irushanwa rya Champions League nyuma yo gutsinda Genk ibitego 4-0. Uyu mutaliyani arazira umusaruro mubi kubera ko mu mikino icyenda yaherukaga gutoza nta ntsinzi n’imwe Napoli ifite.



Iyi kipe yo muri shampiyona y’u Butaliyani ntabwo yari yagatsinda mu mikino icyenda iheruka gukina mu marushanwa yose, ukuyemo umukino wo ku wa kabiri itsinda Genk yo mu Bubiligi 4 -0 mu mukino wabereye ku kibuga cya Napoli.

Uyu wari umwaka wa kabiri w'imikino Ancelotti yari atoje Napoli, ariko ubu iri ku mwanya wa karindwi muri shampiyona nyuma yo kwitwara nabi bikabije mu mikino icyenda iheruka gukina.

Ni yo kipe yonyine gusa yatsinze Liverpool mu minota 90 y'umukino muri uyu mwaka, ubwo yayitsindaga ibitego 2 – 0 muri Champions League.

Mu kwezi gushize kwa cumi na kumwe, umutoza n'abakinnyi ba Napoli bagiranye ubushyamirane bukomeye na perezida wayo Aurelio de Laurentiis. De Laurentiis yategetse ikipe kujya mu mwiherero ariko Ancelotti n'abakinnyi be bose bahise bajya mu rugo.

Ancelotti yegukanye igikombe cya shampiyona ya Premier League yo mu Bwongereza n'icya FA Cup inshuro ebyiri ari kumwe na Chelsea mu mwaka w'imikino wa 2009 - 2010.

Hakomeje kuvugwa ko ashobora kuba yafata akazi k'ubutoza muri Arsenal cyangwa Everton kuri ubu zidafite abatoza b'igihe kirekire.

Ni umwe mu batoza batatu gusa bamaze gutwara ibikombe bitatu bya Champions Leagues - we hamwe n'igihangange Bob Paisley wakiniye akanatoza Liverpool na Zinedine Zidane ubu utoza Real Madrid.

Bisa nk'aho atari azi ko ubuyobozi bw'ikipe buri hafi gutangaza ko yirukanwe, ubwo nyuma y'iyo ntsinzi yagize ati:

"Nzavugana na perezida w'ikipe De Laurentiis ejo hanyuma dufate icyemezo kibereye Napoli".

"Ku bwanjye, mu gihe hari abakinnyi bari kugaruka kandi hagize ibikosorwa, iyi kipe iracyashobora kurangiza shampiyona ku mwanya wa kane".

"Intsinzi yo muri iri joro ryo ku wa kabiri iraturuhuye kandi ishobora gutera abakinnyi akanyabugabo mu gihe kiri imbere".

Amakuru agaragara mu bitangazamakuru byo mu Butaliyani avuga ko Gennaro Gattuso, wirukanwe na AC Milan mu mpera y'umwaka ushize, ashobora kuba ari we usimbura Ancelotti.  

Ancelotti yari amaze imikino 9 adatsinda muri Napoli

Bisa n'aho Ancelotti yatunguwe no kwirukanwa nyuma yo guhesha Napoli itike ya 1/8 muri Champions League

Napoli yanyagiye Genk ibitego 4-0, ibona itike ya 1/8 muri Champions League

Ancelotti bivugwa ko ashobora gusimbura Unai Emery muri Arsenal, asize Napoli ku mwanya wa karindwi muri shampiyona y'u Butaliyani

Gennaro Gattuso biravugwa ko ariwe ushobora gusimbura Ancelotti muri Napoli                                                          





TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND