Airtel Rwanda
Kigali

Arsenal FC yabonye intsinzi ya mbere mu mikino 10, unaba umukino wa mbere Ljungberg atsinze

Yanditswe na: SAFARI Garcon
Taliki:10/12/2019 15:22
0

Nyuma yo kumara imikino 9 Arsenal itabona intsinzi, iminota 45 y’igice cya kabiri yahinduye amateka mabi. Arsenal yari igiye kwandika kuva yashingwa yo kumara imikino 10 nta ntsinzi. Ibitego bitatu byo mu gice cya kabiri byafashije Arsenal kubona intsinzi y’ibitego 3-1, itsindiye West Ham iwayo.



Wari umukino usoza imikino y’umunsi wa 16 muri shampiyona y’u Bwongereza izwi nka ‘Premier League’, Arsenal yari imaze imikino icyenda yikurikiranya idatsinda, yategereje umukino wa 10 kugira ngo ibone intsinzi, inaba intsinzi ya mbere  mu mikino itatu Freddie Ljungberg  atoza iyi kipe nk’umutoza w’agateganyo nyuma yo kwirukanwa kwa Unai Emery.

Iminota 45 y’igice cya mbere yagoye  Arsenal cyane, ubwo umurindi w’abafana b’iyi kipe yari mu rugo wafashije  Angel Ogbona gufungura amazamu atsinda igitego cya mbere cya Westham United ku munota wa 38, ari nako igice cya mbere cyarangiye.

Arsenal yagaragaje imikinire itandukanye mu gice cya kabiri, kuko mu minota icumi gusa yari yamaze kwigaranzura Westham inababaza abafana b’iyi kipe nayo iherereye mu murwa mukuru wa Londre.  Yabonye igitego cyo kwishyura cyatsinzwe n’umunya-Brésil Gabriel Martinelli ku munota wa 60, kikaba icya mbere yari atsinze muri Shampiyona y’u Bwongereza.

Iyi kipe y’abarashi yakomeje gusatira cyane ifunga umwuka Westham, maze nyuma y’iminota itandatu gusa, Umunya-Côte d’Ivoire Nicolas Pépé, yatsinze igitego cya kabiri ku mupira wari uvuye kuri Pierre-Emerick Aubameyang, nyuma gato y’iminota itatu  uyu munya-Gabon na we ashimangira intsinzi ubwo yatsindaga igitego cya gatatu. Iminota 90 y’umukino yarangiye Arsenal yegukanye intsinzi y’ibitego 3-1.

Gutsinda uyu mukino byayifashije guhita  ifata umwanya wa cyenda n’amanota 22 mu gihe West Ham iri ku mwanya wa 16 n’amanota 16. Arsenal izagaruka mu kibuga ku wa Kane, yakirwa na Standard Liège yo mu Bubiligi, mu mukino w’umunsi wa nyuma w’amatsinda muri  Europa League.

Muri Shampiyona y’u Bwongereza, Arsenal Fc izongera gukina ku Cyumweru, aho izaba yakiriye Manchester City mu mukino ukomeye  w’umunsi wa 17 uzabera ku kibuga cya Emirates.


Gabriel Martineli watsinze igitego cya mbere


Aubameyang watsinze igitego cy'intsinzi ya Arsenal


Arsenal yazamutse ku rutonde rwa shampiyona ikaba yageze ku mwanya wa cyenda

Tags:




TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND