MU MAFOTO: Spread love Festival 2019 yafunguriwemo ‘Education Fund’ izafasha abana bafite ubumuga kwiga bakaminuza

Spread Love Festival 2019 yabereye mu Ubumwe Grande Hotel tariki 1/12/2019 kuva saa kumi n’imwe z’umugoroba. Kwinjira byasabaga kuba ufite ubutumire. Yitabiriwe ku rwego rushimishije. Abana bafite ubumuga bagaragaje impano bafite zirimo; Kuririmba, gucuranga ibyuma bya muzika, kuvugira inka, kubwiriza,…Ni ibintu byakoze ku mitima ya benshi bitabiriye iki gikorwa.

Spread Love Festival 2019 yateguwe ku bufatanye n’imiryango y’abana bafite ubumuga n’ibigo babamo ari byo; Izere Mubyeyi, Humura na Tubiteho. Bateguye iri serukiramuco mu kwifatanya n’abana bafite ubumuga gusoza umwaka neza, ari nako aba bana nabo bagaragaza impano bungukiye mu ishuri no mu bigo babamo. Iyi miryango yita kuri aba bana mu buzima bwa buri munsi yasobanukiwe neza ko kwishimana nabo bifasha aba bana kwivana mu bwigunge.

Bimwe mu bikorwa byabereye muri Spread Love Festival 2019 ni Expo aho aba bana bafite ubumuga bagaragaje ibikorwa by’imirimo y’amaboko bakora, nyuma yaho habaho kwifotozanya n’ababyeyi babo n’ababitaho mu rwego rwo gufata amafoto y’urwibutso, hakurikiraho igitaramo baridagadura, bamwe bararirimba, abandi baracuranga, hakinwa ikinamico, n’ibindi.

Ni igikorwa cyitabiriwe na bamwe mu bayobozi banyuranye barimo; Umunyamabanga Nshingwabikorwa wa NCPD, Emmanuel Ndayisaba, uwari uhagarariye Humanity and Inclusion, abayobozi b’ibigo bitandukanye by’abafite ubumuga, abahanzi nka Olivier Nzaramba (UK), Billy Jakes, Alexandre ufite ubumuga bwo kutabona watangaje benshi mu mpano ye yo kuririmba, n’abandi benshi.

Nyuma y’ibi habayeho gutanga impano ku bana bafite ubumuga, hakurikiraho gusangira amafunguro ndetse by'umwihariko hanabaho ‘After party’ aho bidagaduye bya nyabyo. Hitanzwe amagare abiri y’abafite ubumuga, icyakora uwayitanze yifuje ko amazina ye atamenyekana. Tonzi yabwiye Inyarwanda.com ko ashimira cyane buri wese witanze akitabira ‘Spread Love Festival 2019’.

Yanashimira buri wese wabateye inkunga yaba itangazamakuru, ibigo binyuranye ndetse n’abandi batandukanye. Yashimiye cyane Star Times yatanze ibikapu bitanu byo guha abana bafite ubumuga. Protocol muri iki gikorwa yakozwe n’abantu bafite ubumuga bw’ubugufi bukabije, bayikora neza cyane, ibintu byishimiwe na benshi. Tonzi avuga ko bashoboye ndetse arasaba abafite ibigo, abategura ibirori n’ibitaramo kujya babaha akazi.

Tonzi yataramiye abitabiriye ibi birori

Muri Spread Love Festival 2019 hafunguwe ku mugaragaro 'Education Fund’ igamije gukusanya inkunga yo gufasha abana bafite ubumuga kugira ngo babashe kwiga ndetse banaminuze. Nk’uko tubikesha Tonzi, iyi ni yo konti uwifuza kubatera inkunga yakoresha. Tonzi ati: “ 212/229299/1/5101/0 iyo ni compte ya Birashoboka Dufatanyije organization muri GTBank.”

REBA AMAFOTO Y'UKO BYARI BIMEZE MURI SPREAD LOVE FESTIVAL 2019

Ni ibirori byitabiriwe n'abayobozi batandukanye

Bakase umutsima bakorewe na 'Petersbakers'

Olivier Nzaramba yataramiye abari muri ibi birori

Umuhanzi Billy Jakes ari mu bitabiriye iki gikorwa

Emmanuel Ndayisaba Umuyobozi Mukuru wa NCPD

Alpha umugabo wa Tonzi nawe yitabiriye iki gikorwa

Hano basemuriraga abafite ubumuga bwo kutumva

Ibi ni ibimwe mu byakozwe n'abana bafite ubumuga

Alexandre umuhanzi ufite ubumuga bwo kutabona ariko ufite impano itangaje yo kuririmba arimo gushakirwa akazi ko kwigisha gucuranga abafite ubumuga ndetse hari no gushakishwa uko yabona kontaro nziza yo gucuranga nk'uko bitangazwa na Tonzi

Bafashe amafoto y'urwibutso