RFL
Kigali

Robert Lewandowski yanditse amateka atarakorwa n'undi mukinnyi muri Champions League

Yanditswe na: Editor
Taliki:27/11/2019 10:52
0

Robert Lewandowski yabaye umukinnyi wa mbere utsinze ibitego bine byihuse cyane mu mateka ya UEFA Champions League mu mukino Bayern Munich yanyagiyemo Red Star Belgrade yo muri Serbia ibitego 6 - 0 mu mukino wo mu itsinda B wabereye muri Serbia wahise uhesha Bayern Munich itike ya 1/8.



Uyu rutahizamu ukomoka mu gihugu cya Pologne byamusabye iminota 14 n'amasegonda 31 gusa kugira ngo atsinde ibitego bine. Yabaye umukinnyi wa kabiri gusa mu mateka utsinze yikurikiranya mu mikino icyenda yo mu matsinda ya Champions League. Robert Lewandowski yatsinzemo ibitego 4 wenyine muri uyu mukino, agwiza ibitego 10 mu mikino 5 amaze gukina.

Igice cya mbere cyarangiye Bayern ifite igitego 1-0 cyatsinzwe na Leon Goretzka ku mupira yaherejwe na Philippe Coutinho, Lewandowski ahushamo penaliti, mu gice cya kabiri Lewandowski yagarutse mu kibuga yariye karungu abatsinda ibitego 4 wenyine, mu gihe Corentin Tolisso yashyizemo icya gatandatu.

Lewandowski w'imyaka 31 y'amavuko yinjije penaliti ku munota wa 53 yabaye igitego cya kabiri cya Bayern, mu minota irindwi ya nyuma yaho (ku wa 60, 64 n'uwa 67) atsinda ibindi bitego bitatu mu buryo umunyezamu Milan Borjan wa Red Star na we atasobanukiwe.

Lewandowski yujuje ku bitego 30 amaze gutsindira iyi kipe n'igihugu cye muri uyu mwaka w'imikino, uyu mukino wari uwa 24 akinnye muri uyu mwaka. Ibitego 10 muri ibyo yabitsinze mu mikino yo mu matsinda ya Champions League. Ku rubuga nkoranyambaga rwa Twitter, Lewandowski yagize ati: "Ngomba kubabwiza ukuri… nagizwe imbata no gutsinda ibitego…"

Mu mwaka wa 2015, Lewandowski yatsinze ibitego bitanu mu minota icyenda nyuma yo kwinjira mu kibuga asimbuye, mu mukino Bayern yatsinzemo Wolfsburg kabaye agahigo aciye ko gutsinda ibitego bitanu byihuse cyane bitsinzwe n'umukinnyi umwe mu mateka ya shampiyona ya Bundesliga yo mu Budage.

Bayern Munich imaze gutsinda imikino yose itanu imaze gukina mu itsinda ryayo rya B ndetse yamaze kubona itike yo gukina imikino ya 1/8. Gutsindwa kwa Red Star kuvuze ko Tottenham y'umutoza Jose Mourinho isanze Bayern mu mikino ya 1/8 iri ku mwanya wa kabiri nyuma yo gutsinda Olympiakos ibitego 4 - 2.

Ni intangiriro nziza kandi ku mutoza wayo w'inzibacyuho Hansi Flick, kuri ubu utoza Bayern kuva yakwirukana uwari umutoza wayo Niko Kovac ubwo yari imaze gutsindwa ibitego 5 - 1 na Eintracht Frankfurt.


Lewandowiski yanditse amateka yo gutsinda ibitego 4 mu minota 14 n'amasegonda 31 muri UCL


Lewandowiski avuga ko yagizwe imbata no gutsinda ibitego

Umwanditsi – SAFARI Garcon – inyarwanda.com

    






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND