Kanyenzi System waririmbye Hotel Kiyovu ati "Mu muziki baraguharara ariko amaherezo ugasaza nabi" -VIDEO

Kanyenzi System atuye mu Murenge wa Jabana i Karuruma afite imyaka 53. Yatangiye umuziki mu 1974 ari muri Orchestre Muhabura nyuma yaho mu 1976 ajya muri Orchestre Amizero, aririmbana n’abahanzi nka Rutagarama Martin. 

Indirimbo yamuhaye ubwamamare ni iyitwa Hotel Kiyovu ikubiyemo inkuru mpamo y’ibyamubayeho, yakoranye na Nyirinkwaya Alex mu 1984. Avuga ko iyi ndirimbo yakunze kuko ibiri muri iyi ndirimbo hari benshi byagiye bibaho. Ati”Si njye gusa byabayeho byatumye ikundwa mu Rwanda ndetse no mu mahanga”.

Nyuma y'uko Nyirinkwaya atabarutse yahise ashinga indi Orchestre yitwa Irangura. Avuga ko nk'abahanzi bakuze uyu muziki bakora urimo imvune zikomeye kuko ntababitaho cyangwa ngo babashyigikire. Ati”Umuziki urawukora bakaguharara ariko mu masaziro ugasanga ushaje nabi kuko ntawe uba akikwitayeho”.

Yasabye abafite aho bahuriye n’imyidagaduro, abahanzi bakiri bato, abategura ibitaramo kwibuka kujya batumira abahanzi bakuze mu rwego rwo gusigasira impano bafite. Ibi kugira ngo bigerweho asanga ishyirahamwe ry’abahanzi naryo rikwiriye kubishyiramo imbaraga kuko iyo wakoraga umuziki bigahagarara ubaho nabi. 

Yasabye abahanzi bakiri bato kutiringira umuziki gusa ahubwo bakajya biteganyiriza kugira ngo bazabone ikibagoboka mu zabukuru. Ati”Mbagiriye inama bagakwiye kujya bagira ikindi bakora kizabafasha mu masaziro”. Asanga umuziki bakora uvanzwe n’uw'abahanzi bato byarushaho kuba byiza kandi bigateza imbere umuziki nyarwanda muri rusange.

UMVA HANO UKO AGARAGAZA IMVUNE Z'ABAHANZI BAKUZE

UMWANDITSI:Neza Valens-inyarwanda.com