MTN
Kigali

Abarangije muri Akilah Institute basabwe kubyaza umusaruro ubumenyi bahakuye-AMAFOTO

Yanditswe na: Editor
Taliki:14/11/2019 21:40
0

Ishuri Rikuru ryigisha abari n’abategarugori rya Akilah Institute for Women ryatanze impamyabumenyi ku bari n’abategarugori basoje ikiciro cya mbere cya Kaminuza "Diploma" basabwa kubyaza umusaruro amahirwe ndetse n’ubumenyi bakuye muri iyi Kaminuza mu guhatana ku isoko ry’umurimo.



Umuhango wo gutanga impamyabumenyi z’icyiciro cya mbere cya Kaminuza ku bari n’abategarugori 304 wabereye muri Kigali Convention Center kuri uyu wa 14 Ugushyingo 2019. Ni ku nshuro ya karindwi iri shuri ritanga impamyabumenyi y'icyiciro cya mbere cya Kaminuza, kuva mu mwaka wa 2010.

Umuyobozi ushinzwe amasomo muri iyi kaminuza ya Akilah, Madamu Aline Kabanda asanga ari intambwe ishimishije imaze guterwa nyuma yaho batangirije iyi Kaminuza mu Rwanda.

Ati: “...Abanyeshuri bacu mu masomo tubaha tubigisha no kuyobora mu rwego rwo kubategura kutajya hanze ngo biruke bashaka akazi ahubwo bo bagomba guhanga imirimo bagakoresha abandi.”

Umushyitsi mukuru muri uyu muhango yari umuyobozi uhagarariye UN-WOMEN mu Rwanda, Fatou Lo yashimye uruhare iyi kaminuza igira mu guteza imbere uburezi ku mwana w’umukobwa.

Ati “Ntabwo muzagenda mwenyine, n'ubwo mu nzira ibibazo bitabura ariko turi hano ngo tubashyigikire. Uburezi bw’umwana w’umukobwa bwakabaye intego kuri buri wese kuko buteza imbere buri wese muri rusange.”

Madamu Fatou Lo umuyobozi wa UN-WOMEN mu Rwanda

Yahaye impanuro aba banyeshuri abasaba kubanza kwimenya ndetse bakagira ubuzima bufite intego ikirenze kuri ibyo bakajya bahora barangajwe imbere no guhanga udushya mu buzima bagiye gutangira hanze aha.

Umunyeshuri wahize abandi, Mukabashimwe Jeaninne yavuze akamuri ku umutima nyuma y’urugendo rutoroshye yanyuzemo aho yabihuje no gushaka imirimo ngo abashe kwitunga we n’umuryango we.

Yavuze ati "...Natangiye muri Akilah muri 2017 mbere yaho nari narabyifuje kenshi ariko ntibyankundira n'ubwo bitari byoroshye icyo gihe kuko umuryango wanjye nti wari ufite ubushobozi buhagije bwo kunyishyurira amashuri makuru byansabye kwiga nshyizemo imbaraga ndetse mu dufaranga twa buruse nahabwaga nkagira n'utwo nkuramo nkarihira barumuna banjye bari mu mashuri yisumbuye.”

Mukabashimwe Jeaninne wahize abandi mu manota

Madamu Elizabeth Dearborn Hughes washinze Kaminuza ya Akilah yasabye abagiye ku isoko ry’umurimo kureba kure ntibitekerezeho bo ubwabo gusa ko ahubwo isi yose ibategereje, bagakwiye kubyaza umusaruro ayo mahirwe.

Yagize ati "Uri ibyo ukora, ntabwo uri ibyo utekereza , ntabwo uri uwo ushaka kuba we, nta n'ubwo uri uwo wiyumva mu ndoto zawe. Uri wowe ubwawe ndetse ni impinduka uzaniye Isi zigomba kuba zifitiye inyungu umuryango mugari muri rusange.”

Kaminuza ya Akilah yatangiye mu Rwanda guhera mu mwaka wa 2010 mu rwego rwo kugabanya icyuho ku burezi bw’umwana w’umukobwa.

Yatangiranye abanyeshuri bagera kuri 50 igeze ku rwego rwo gushyira ku isoko abagera kuri 304 basoje ikiciro cya mbere cya kaminuza.

Abasoje ikiciro cya mbere cya kaminuza muri Akilah basoje mu mashami arimo ‘Hospitality Management’ Ishami rya ‘Management and Enterpreneurship’ hamwe n’ishami rya ‘Information System’.

Abanyeshuri 304 basoje amasomo muri Kaminuza ya Akilah

 

Umugabekazi Rebecca Umunyamakuru wa Televiziyo y'u Rwanda (RTV)







Umwanditsi: Eric RUZINDANA – INYARWANDA.COM

AMAFOTO: Evode MUGUNGA – INYARWANDA ART STUDIO








Inyarwanda Art studio
Inyarwanda BACKGROUND