Bolivia: Jeanine Áñez yatangaje ko ubu ari we Perezida w’iki gihugu, arashinjwa gukora 'Coup d'd'état'

Abanyashingamategeko bo ku ruhande rwa Morales bari banze kwitabira imirimo y'inteko, bivuze ko nta bwiganze bwabayeho kuri iki cyemezo. Gusa Madamu Áñez yavuze ko ku rukurikirane rw'abategetsi rugenwa n'itegeko nshinga ari we uri hafi, asezeranya ko azahita ategura amatora vuba.

Bwana Morales aho ari mu buhungiro muri Mexique, yamaganye ibyatangajwe na Madamu Jeanine Áñez, avuga ko ari 'coup d'd'état' y'"uburiganya bwinshi cyane" ya mbere mu mateka. Bwana Morales aho ari mu buhungiro yavuze ko ubuzima bwe bwari buri buri mu kaga muri iki gihugu yari ayoboye imyaka 14.

Evo Morales yeguye ku cyumweru nyuma y'ibyumweru by'imyigaragambyo yamaganaga ko yongeye gutorerwa kuyobora igihugu kuri manda ya kane. Yatangaje ko yemeye kuva ku butegetsi kugira ngo hatameneka amaraso

Ejo ku wa kabiri Madamu Áñez yafashe by'igihe gito ubuyobozi bwa sena, bihita bituma aba ushobora gusimbura perezida. Uyu mugore wahoze ari umuyobozi wungirije wa sena y'iki gihugu, yafashe uyu mwanya nyuma yo kwegura kw'abayobozi batandukanye.

Imirimo y'inteko yateranye ejo ku wa kabiri ariko abashimategeko bo ku ruhande rwa Evo Morales banze kuyitabira bavuga ko itemewe n'amategeko.

Mu mirimo y'iyi nteko, Madamu Áñez yagize ati: "Kubera kubura kwa perezida na visi perezida...aka kanya ntangaje ko mfashe umwanya wa perezida nk'uko biteganywa n'itegeko nshinga."

Abashimangamategeko bari mu nteko bahise bakoma yombi.

Evo Morales, wahoze ari umuhinzi w'igihingwa cya Coca, mu 2006 yatorewe kuyobora igihugu ari we wa mbere ukomotse mu bwoko bwa ba nyamucye utorewe uyu mwanya.

Yarashimwe cyane kubera ibikorwa bikomeye byo kurwanya ubukene n'ubusumbane muri iki gihugu. Nyuma ariko yaranenzwe kubera guhindura itegeko nshinga kugira ngo yiyamamarize manda ya kane.

Iyi manda yaje kuyitorerwa mu kwezi gushize kwa 10 ariko abaturage benshi barigaragambya bamagana itorwa rye bemezaga ko ryabayemo uburiganya. Umugaba w'ingabo z'igihugu Gen Williams Kaliman yasabye Bwana Morales kwegura kugira ngo ibintu ntibirusheho kumera nabi mu gihugu.

Ejo ku wa kabiri ni bwo Bwana Morales yageze mu buhungiro aho yashimiye Perezida Andres Manuel Lopez Obrador wa Mexique ko "yakijije ubuzima bwe".

Src: BBC