Abegukanye ibihembo bya ‘Kiss Summer Awards 2019’ batangajwe-AMAFOTO

Mu ijoro ry’iki cyumweru tariki 27 Ukwakira 2019 nibwo Radio ya Kiss Fm itegura ibi bihembo bya ‘Kiss Summer Awards 2019’ yatangaje abahanzi batatu na Producer umwe begukanye ibihembo.

Umuhango wo gutangaza abegukanye ibihembo wakozwe n’abanyamakuru ba Kiss Fm; Antoinette Niyongira, Arthur Nkusi, Luwano Tosh [Uncle Austin], Sandrine Isheja, Bagwire Keza Joanna [Miss Heritage 2015] na Cyuzuzo Jean d’Arc.

Producer Made Beat yegukanye igihembo cya ‘Best Summer Producer’ mu bihembo bya Kiss Summer 2019. MadeBeat amaze iminsi yigaruriye isoko ry’umuziki nyarwanda; yarambitse ibiganza ku ndirimbo nka “Kungola”, “Katerina”, “Abana babi”, “Kontwari” n’izindi.

Made Beat yahigitse Producer Clement Ishimwe Karake wa Kina Music, Lick Lick washinze MoMusic na Press One Entertainment, Danny Beat ndetse na Producer Knobeat. 

Umuhanzi Amalon wo muri 1K Entertainement yegukanye igihembo cya ‘New Summer Artist 2019’.

Ni umuhanzi wakunzwe mu ndirimbo nka “Yambi” yamwaguriye igikundiro, “Byakubaho” imaze iminsi ihagaze neza mu tubyiniro, kuri Radio n’ahandi anaherutse gushyira hanze indirimbo “Impanga”.  

Muri iki cyicico cy’umuhanzi mushya ‘Best New Summer’ wigaragaje muri iyi mpeshya ya 2019, Amalon yahigitse Kevin Saka, Sunny na Nel Ngabo wo muri Kina Music.  

Umuhanzi Safi Madiba ubarizwa muri ‘Label’ ya The Mane yegukanye igihembo cya ‘Best Summer Song’ abicyesha indirimbo ye “Kontwari”.

Muri iki cyiciro cy’indirimbo y’impeshyi ya 2019, indirimbo ya Safi yahigitse “Twifunze” y’umuhanzi Sintex, “Abana babi” ya Danny Vumbi na ‘All Night’ ya Meddy. 

Umuhanzi Itahiwacu Bruce [Bruce Melodie] yegukanye igihembo cya ‘Best Summer Artist’. Yarushije amanota The Ben, Meddy, Charly na Nina na Nsengiyumva uzwi nka Igisupusupu.

Mu cyiciro cya Producer w’impeshyi hifashishijwe Akanama Nkemurampaka ndetse n’amajwi y’abatoye. Ni mu gihe mu bindi byiciro bitatu hashingiwe ku majwi buri muhanzi yagize.   

Ibihembo bya ‘Kiss Summer Awards’ bitegurwa hagamije gushimira abaririmbyi n’aba-Producer ku kazi katoroshye baba barakoze mu rugendo rw’umuziki no kubereka ko Kiss Fm izirikana imirimo yabo.

MadeBeat yegukanye igihembo cya 'Best Summer Producer'

Bruce Melodie yashyikirijwe igihembo cya 'Best Summer Artist'. Yagishyikirijwe n'umunyamakuru Isheja Butera Sandrine

Muri Studio za Kiss Fm byari ibirori!

Umunyamakuru Cyuzuzo Jean D'Arc

Umunyamakuru Sandrine Isheja

Bagwire Keza Joanna Miss Heritage 2015 Umunyamakuru wa Kiss Fm

Umuhanzi Amalon yegukanye igihembo cya 'New Summer Artist'

Gahunzire Aristide Umujyanama wa 'Label' ya The Mane yashyikirijwe igihembo Safi Madiba yegukanye ibicyesha indirimbo ye 'Kontwari'

Umunyamakuru Uncle Austin