Inyarwanda art Studio
Kigali

Amateka ya Rufuro (Byeri) yengewe bwa mbere mu Rwanda mu 1959

Yanditswe na: Editor
Taliki:10/10/2019 10:12
0

Iwacu mu rw’imisozi igihumbi yatangiye kuhengerwa mu mwaka wa 1959. Ku bwa sogokuru bagiraga amako y’inzoga menshi gusa zose zaba ari gakondo ntabwo zabaga zaciye mu ruganda. Inyinshi zabaga zatazwe ku rusenge ndetse no mu nzina ku buryo hari n’izamaraga ibyumweru bitatu zitaze.



Amateka avuga iki kuri byeri?

Byeri iyi benshi bakunda kwita rufuro ifite amateka menshi cyane mu bihugu bitanduanye. Iwacu mu rwa Gasabo agapfundikiye kahengewe bwa mbere mu wa 1959. 

Uruganda rw’Ababirigi rwitwaga Brasserie de Leopold Ville, ni rwo rwaguye amarembo ruza gukorera mu Rwanda. Uru ruganda ni rwo rwenze agapfundikiye ka mbere.

Ibi ariko ntibisobanuye ko mbere y’umwaduko w’abera, abanyarwanda batengaga inzoga ziri mu bwoko bwa byeri. Urugero nk’ikigage ndetse n’izindi.

Byeri mu Burasirazuba bwo hagati bw’isi

Byeri zikunzwe kunwebwa na benshi cyane hano mu Rwanda biragoye kumenya gutandukanya abakoze bwa mbere inzoga ziri mu bwoko bwa byeri hagati y’ubwami bwa Mezopotamiya (Mesopotamia) n’ubwa Misiri.

Ku mpapuro zandikiwe mu Misiri mu myaka y’ 5000 mbere y’ivuka rya Kristu, yerekana ko byeri zakoreshwaga mu mihango y’iyobokamana.

Hari n’inyandiko zivuga ko abafaraho (abami) bo mu Misiri ari bo rimwe na rimwe batangaga amabwiriza y’uko izo nzoga zagombaga kuba zenzwe. Izo nzoga ntizaheraga i bwami cyangwa mu mihango gusa ahubwo no muri rubanda zarahabaga.

Nubwo bwose inyandiko ya kera yerekana uko abanyamisiri bengaga inzoga ziri mu bwoko bwa byeri si yo yatuma abantu banzura ko ari bo babaye aba mbere mu kwenga izi nzoga.

Abanyamisiri kimwe n’abo mu bwami bwa Mesopotamiya bigaragara ko bari mu bwoko bw’abatuye isi benze kandi bagakoresha ibi binyobwa mu buzima bwabo bwa buri munsi.

Aba baturage bari batuye ubu bwami, ikindi kintu kibahuza n’uko bose bahingaga ibihingwa byiganjemo ibinyampeke. Nyuma yo gusarura ntibaryaga gusa ibi binyampeke ahubwo bize n’uburyo bwo kwengamo ibinyobwa.


Urugendo rwa byeri i Burayi. 

Biragoye kumenya umwaka abanyaburayi batangiye kujya benga inzoga zo mu bwoko bwa byeri. Mutagatifu Benendigito wabayeho mu mwaka wa 480-547 uzwiho kuba yarashinze inzu nyinshi z’abamonaki, mu mategeko yatanze yagengaga abo bihaye Imana harimo no gufasha.

Dore ko kera hatabagaho imodoka, indege cyangwa se ibindi byari gufasha abanyarugendo kwihuta ndetse no kutananirwa mu ngendo zabo, aba kera barahatikiriraga.

Mu rwego rwo gufasha aba banyarugendo, abamonaki babahaga byeri mu rwego rwo kubamara inyota ndetse no kubatera imbaraga dore ko iki kinyobwa kiba gikozwe mu binyampeke.

Mu gihe za Kiriziya zubakagwa hirya no hino i Burayi, abihaye Imana ku mafunguro bagaburiraga abubatsi babarengerezagaho na byeri. Kuva ubwo rero kugeza magingo aya mu ngo z’abihaye Imana (Gatorika) mu burayi, izitwa “Abbeye” bakunda kwenga izi nzoga.

Mu mwaka wa 1517 uwari duke wa Bavaria, William wa kane yashyizeho amategeko twakwita nk’agenga ubuziranenge bw’ibiribwa. Yaje gutegeka ko byeri zizajya zikorwa mu binyampeke n’amazi gusa. 

Nyuma y’ubuvumbuzi bwakozwe n’umuhanga w’Umufaransa Louis Pasteur yerekana uko gusembura ibinyobwa bikorwa, inganda nyinshi zakoresheje ubu buvumbuzi mu gukora ingano nyinshi ya byeri zoherezaga ku masoko.

Ibi ntibisobanuye ko mbere ya Louis Pasteur basemburaga ahubwo n’uko nta muntu wari wakavumbuye uburyo byasobanurwamo mu rwego rwa gihanga.

Byeri zengwaga n’inganda zaje kujya zishyirwa mu macupa kugira ngo zitangirika. Uko gufundikirwa byatumye inzoga zishobora kujyanwa ku masoko ya kure ndetse zikaba zamara igihe.

Ubu hirya no hino inzoga ziri mu bwoko bwa byeri zirengwa ndetse zikananyobwa. Iwacu mu rwa Gasabo na ho izipfundikiye zirahengerwa kuva mu 1959.

Inyandiko zifashishijwe mu gukora inkuru:  Beer dictionary, History Channel…

Umwanditsi: Christian Mukama








Bahaus

Inyarwanda BACKGROUND