Umuraperi Ambwene Allen Yessayah wamenyekanye mu muziki ku izina rya A.Y, yakozwe ku mutima n’indirimbo ye ‘Zigo Remix’ yakoranye na Diamond Platnumz yacurangiwe mu kabyiniro ka ‘People Club’ yarimo mu ijoro ryo ku cyumweru.
Uyu muraperi ari i Kigali kuva kuwa Gatandatu w’icyumweru twasoje aho acumbitse muri Serena Hotel. Ku cyumweru yatunguranye mu kabyiniro ka ‘People Club’ ahagana saa cyenda z’ijoro ari kumwe n’inshuti ze.
Dj Manzi ugezweho mu kuvangavanga imiziki yacuranze indirimbo ‘Zigo Remix’ A.Y yakoranye na Diamond imaze kurebwa n’abarenga Miliyoni 11 ku rubuga rwa Youtube, abari muri aka kabyiniro bagaragaraza ibyishimo.
Amashusho yafashwe na telefoni agaragaza A.Y asanganira Dj Manzi aho yacurangiraga agakoresha telefoni ye bakifotozanya ndetse agafata n’amashusho agaragaza ibyishimo byo kumvira indirimbo ye mu kabyiniro yasohokeyemo.
Dj Manzi wari kumwe n’inshuti ye Kevin, yabwiye INYARWANDA, ko we na A.Y bahanye nimero za telefoni ndetse ngo nyuma habayeho gusangira no kuganira.
Ati “Nacuranze indirimbo ‘Zigo Remix’ yakoranye na Diamond aza aho nari ndi afata amashusho birangiye arampamagara turasangira duhana na nimero.”
Dj Manzi asanzwe acurangira ‘People Club’, ‘Skylux’ na ‘The Manor Hotel’. Indirimbo ‘Zigo’ yacuranze A.Y yabanje kuyishyira hanze mu 2016 yumvwa n’abantu 78, 703 ku rubuga rwa Youtube. Yaje kuyisubiramo yifashishije Diamond iramenyekana birushijeho kuva ubwo.
A.Y yavukiye i Mtwara mu Majyepfo ya Tanzania. Yatangiriye umuziki mu itsinda rya S.O.G mu 1996. Mu 2002 yanzuye gutangira urugendo rw’umuziki ku giti cye. Ari mu bahanzi bo muri Tanzania bagize amafaranga abicyesha injyana ya ‘Bongo Flava’.
Ari i Kigali nyuma y’iminsi mike bivuzwe ko yatandukanye n’umunyarwandakazi Rehema [Remy].
KANDA HANO UREBE INDIRIMBO 'ZIGO REMIX' YA A.Y NA DIAMOND
Eng
RSS 
TANGA IGITECYEREZO