RFL
Kigali

Johnny Drille yatanze ibyishimo bisesuye, Sintex aganuza abafana-AMAFOTO

Yanditswe na: Janvier Iyamuremye
Taliki:28/09/2019 6:25
0


Umuhanzi w’icyamamare mu ndirimbo zubakiye ku rukundo, John Ighodaro wamenyekanye mu muziki nka Johnny Drille yatanze ibyishimo bisesuye ku mubare munini witabiriye igitaramo cya Kigali Jazz Junction, cyabaye kuri uyu wa Gatanu tariki 27 Nzeri 2019 muri Parking ya Camp Kigali.



Kigali Jazz Junction yabaye nyuma y’amezi atatu yari ashize y’akaruhuko. Kuri iyi nshuro abahanzi bari ku rutonde ni Johnny Drille wo muri Nigeria, Sintex, M.France na Stanza Africa batabashije kuririmba ku mpamvu z’uko batubahirije igihe nk’uko amakuru agera ku INYARWANDA.COM abihamya.

Iki gitaramo cyahuriranye n’ibindi bitaramo byihagazeho mu Mujyi wa Kigali nk’igitaramo cyateguwe n’Umujyi wa Kigali, igitaramo cya Happy Silent Disco muri White Club Kimironko n’ahandi. Ibi byaba imwe mu mpamvu yatumye iki gitaramo cya Kigali Jazz Junction kigira ubwitabire budakanganye.

Iki gitaramo cyatewe inkunga n’Uruganda rwa Bralirwa binyuze mu kinyobwa cyayo cya Mutziig. Sintex niwe wabanje ku rubyiniro mbere y’uko umuhanzi Mukuru ahabwa ikaze. Uyu muhanzi ubarizwa muri Arthur Nation yahinduye umuvuno mu muziki kuko aririmba byinshi binyuzwa ku nyakira mashusho.

Ni umwe mu bahanzi b’abahanga u Rwanda rufite wubakiye ku njyana ya Dancehall ivanze n’ikinyafurika ikunzwe muri iki gihe. Yahereye ku ndirimbo yise “Ndorera” amaze iminsi ateguza abafana be azashyira hanze mu minsi iri imbere.

Ni indirimbo yiganjemo umudiho yakunzwe n’abatari bacye muri iki gitaramo bayumvishijwe ku nshuro ya mbere. Indirimbo ‘You’ amaze amezi umunani ashyize hanze, yamwaguriye umubare w’abafana muri iki gitaramo.

Ni indirimbo yaririmbye ku nyakira mashusho herekanwa amwe mu mafoto meza y’abahanzi nyarwanda bazwi barimo Charly, Nina n’abandi. Uyu muhanzi yavuze ko acishijwe bugufi n’urukundo yaretswe mu gitaramo.

Ati “Nishimye kubona amasura yanyu acyeye. Nanejejewe kandi n’uko mwanyakiriye."

Sintex yaririmbye indirimbo "Ndorera" yitegura gushyira hanze mu minsi iri imbere

Yongeyeho indirimbo “Why” imaze umwaka umwe isohotse, “Byina” n’izindi zatumye akurirwa ingofero. Mu gushimisha abafana be yitwaje itsinda ry’ababyinnyi b’abasore n’abakobwa bamufashije gutanga ibyishimo kuri benshi.

Mu buryo bw’amajwi yafashishijwe na Neptunez Band aririmba indirimbo ze zose mu buryo bwa ‘Live’. Yavuye ku rubyiniro akomerwa amashyi na benshi banyuzwe n’uko yabaririmbiye.

Umuhanzi Mukuru! Johnny Drille yahamagawe ku rubyiniro saa tanu n’iminota 03’. Uyu musore w’imyaka 29 y’amavuko yaserutse yambaye imyenda y’ibara ry’umukara, inkweto z’umukara, amataratara, umusatsi yakaraze n’indi mirimbo y’ubwiza.

Yakirijwe amashyi y’urufaya n’akaruru k’ibyishimo ka benshi mu bakobwa banyuzwe n’ijwi ry’uyu musore wo muri Marvin Records.

Johnny yafashe indangururamajwi maze agira ati “Nishimiye gutaramira mu Rwanda ku nshuro ya mbere ku rubyiniro rwanyuzeho abahanzi bakomeye. Ni ishema rikomeye kuri njye kuba mfite abafana mu Rwanda, muri Nigeria n’ahandi.”

Mbere y’uko aririmba yabajije abitabiriye iki gitaramo indirimbo bashaka ko abaririmbira maze bahanika amajwi buri wese asaba iyo ashaka kumva.

Uyu muhanzi yaririmbye mu buryo bwa ‘live’ akanyuzamo akicurangira. Yafashijwe kuri gitari n’abasore babiri harimo n’umunyarwanda Salvator, inshuti ye yanamuhitiyemo izina ry’indirimbo yahimbiye umunyarwandakazi.

Mbere y’uko aririmba indirimbo ‘Finding Efe’, yavuze ko ari inkuru mpamo y’ibyamubayeho mu myaka itambutse. Yavuze ko igihe kimwe yahuye n’umukobwa uteye neza amusaba kwifotozanya nawe aramwemerera. Ngo yari umusore ugira amasoni ku buryo yatashye atatse nimero ya telefoni.

Yongeye guhura n’uyu mukobwa baribwirana ariko ntiyamwaka nimero ya telefoni kubera ubwoba. Avuga ko inkuru ye n’uyu mukobwa yashibutsemo iyi ndirimbo ‘Finding efe’ imaze amezi atanu isohotse ku rubuga rwa Youtube

Indirimbo z’abandi bahanzi yaririmbye harimo nka ‘Jolie’ ya Dolly Parton, ‘Perfect’ ya Ed Sheeran n’izindi.

Yishimiwe na benshi ubwo yavugaga mu Kinyarwanda ati “Murakoze”. Yavuze ko amaze iminsi agerageza kwiga amwe mu magambo agize ururimi rw’Ikinyarwanda n’ubwo bikimugoye.

Yasoreje ku ndirimbo “Wait for me”, “Romeo&Juliet” yatumye amenyekana, na “Hallelua” yakoranye na Simi. Zimwe mu ndirimbo yaririmbaga byasabaga ijwi ry’umukobwa yifashishaga abagize itsinda rya Neptunez Band.

Uyu muhanzi avuga ko yanyuzwe n'urukundo yeretswe n'abafana be

Sintex ukunzwe mu ndirimbo "Twifunze" ku rubyiniro rwa Kigali Jazz Junction

Johnny Drille yashimye uko yafashishijwe na Neptunez Band kunoza ijwi rye

Johnny Drille yavuze ko uyu munyarwandakazi basanzwe bandikirana binyuze kuri instagram

Abakunzi be bashiranye urukumbuzi!

Uyu muhanzi yambaye yibanze ku ibara ry'umukara

Yashimye urukundo yeretswe mu gitaramo

Abagize Neptunez Band banyuze Johnny Drille

Umubyinnyi Sherrie Silver n'umuhanzi Yvan Buravan

Ibyishimo ku basohokanye mu gitaramo cya mbere Johnny Drille akoreye i Kigali

Yitegereza Johnny Drille yakunze igihe kinini, byamurenze!

Yabitse amafoto n'amashusho y'urwibutso rw'iki gitaramo

'Mutzig' yabaye gahuza miryango mu gitaramo isiga ubusabane

Umunyarwenya Arthur Nkusi akaba Umunyamakuru wa Kiss Fm wanashinze Arthur Nation ibarizwamo umuvandimwe we Sintex

Gaelle [ubanza ibumoso] na Miss Fiona Muthoni [uri iburyo]

Kanda hano urebe amafoto menshi

AMAFOTO: Evode Mugunga-INYARWANDA ART STUDIO






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND