Airtel Rwanda
Kigali

Umubare w'abamaze kwicwa na Ebola muri DR Congo ugeze ku bantu 2000

Yanditswe na: Kaliza Liliane
Taliki:2/09/2019 11:53
0

Umubare w'abantu bamaze guhitanwa na Ebola muri Repubulika ya Demokarasi ya Congo umaze kugera ku 2000 nkuko bigaragazwa n'imibare ya leta y'iki gihugu.



Abategetsi b'urwego rw'ubuzima bakomeje kugorwa no guhagarika gukwirakwira kwa Ebola kuva yakongera kwaduka mu kwezi kwa munani k'umwaka ushize. Igihugu gituranyi cya Uganda cyatangaje ko umukobwa w'imyaka icyenda y'amavuko wari wambutse umupaka ava muri Congo yapfuye azize Ebola ku munsi w'ejo ku wa gatanu.

Ishami ry'umuryango w'abibumbye ryita ku buzima (OMS) ritangaza ko Ebola muri Congo ari kimwe "mu byago bikomeye by'urusobe byibasiye abantu" bibayeho mu mateka y'isi. Icyorezo cya Ebola muri Congo kihadutse ku nshuro ya 10 mu mateka ni cyo cya kabiri gikomeye kibayeho ku isi, aho ubu abamaze kwandura Ebola barenga 3000, nk'uko imibare ya leta ibigaragaza.

Icyorezo cya mbere cya Ebola gikomeye kurusha ibindi ni ikibasiye ibice bimwe byo mu burengerazuba bw'Afurika kuva mu mwaka wa 2014 kugera mu wa 2016. Cyahitanye abantu barenga 11,000. Muri Uganda, uwo mwana w'umukobwa wari urwaye Ebola yari yashyizwe mu kato yoherezwa ahavurirwa Ebola ari naho yapfiriye.

Bivugwa ko yari yambutse umupaka wa Congo ari kumwe na nyina, na we washyizwe mu kato kugeza ubwo azashobora gusubizwa mu gihugu cye. Uganda ikomeje ahanini gushobora gukora neza ibikorwa byo ku mupaka na Congo byo gusuzuma Ebola, mu rwego rwo kwirinda ko yambuka umupaka igafatira na Uganda.

Mu kwezi kwa gatandatu uyu mwaka, muri Uganda habonetse abantu babiri barwaye Ebola.

Icyo gihe, umugabo w'Umunya-Uganda n'umugore we ukomoka muri Congo bapfushije abahungu babo babiri nyuma yo kuva muri Congo aho bari baragiye gusura benewabo.


Ebola ni ndwara ki?

Ebola ni virusi itangira itera umuntu guhinda umuriro, gucika intege cyane, kubabara imitsi no kubabara mu muhogo.

Uko irushaho gukomera, uyirwaye araruka, agacibwamo ndetse akavira imbere ndetse akava n'amaraso mu bice byo hanze by'umubiri.

Abantu bayandura iyo bagize aho bahurira n'abayirwaye, nk'ahari igikomere ku mubiri, mu kanwa no mu mazuru, mu maraso, mu myanda iva mu mubiri cyangwa mu cyuya cy'uyirwaye.

  Abarwayi ba Ebola akenshi bahitanwa n'umwuma ndetse no kunanirwa gukora kw'ingingo zimwe na zimwe z'umubiri.

Src: BBC 







Inyarwanda Art studio
Inyarwanda BACKGROUND