MTN
Kigali

TOTAL CAFCC: Proline FC yatsindiye kuzahura na AS Kigali mu ijonjora rya kabiri

Yanditswe na: Mihigo Saddam
Taliki:24/08/2019 19:52
0

Ikipe ya Proline FC iheruka mu Rwanda mu mikino ya CECAFA Kagame Cup 2019 yatsindiye kuzahura na AS Kigali mu mikino y’ijonjora rya kabiri rya Total CAF Confederation Cup 2019-2020 nyuma yo gusezerera Masters Security (Malawi) ku giteranyo cy’ibitego 3-0.



Impuzamashyirahamwe y’umupira w’amaguru muri Afurika (CAF) yari yateguye ko ikipe zizava hagati ya AS Kigali (Rwanda) na KMC (Tanzania) ndetse n’ikipe izakomeza hagati ya Proline FC na Master Security (Malawi) zizahita zihurira mu mikino ibiri mu ijonjora rya kabiri rya Total CAF Confederation Cup 2019-2020.

AS Kigali yageze muri iki cyiciro nyuma yo gusezerera KMC (Tanzania) ku giteranyo cy’ibitego 2-1 kuko umukino ubanza banganyije 0-0 i Kigali mbere y’uko AS Kigali ibatsindira i Dar Es Slaam ibitego 2-1.


AS Kigali yakuye ishema muri Tanzania

Mu mukino wo kwishyura, Rachid Kalisa ukina hagati akaba umukinnyi uhagaze neza mu bakina imbere mu gihugu, yatanze icyizere ku banyamujyi afungura amazamu ku munota wa 28’ mbere y’uko Nsabimana Eric Zidane yungamo ikindi ku munota wa 63’ w’umukino.

Proline FC (Uganda) yageze mu ijonjora rya kabiri ikuyemo Masters Security (Malawi) ku giteranyo cy’ibitego 3-0. Umukino ubanza wabereye i Kampala. Proline FC yanyagiye Masters Security ibitego 3-0, umukino wo kwishyura wabereye i Malawi, amakipe yombi yaguye miswi anganya 0-0. Bivuze ko Proline FC yakomeje ku giteranyo cy’ibitego 3-0.


Proline FC izahura na AS Kigali mu ijonjora rya kabiri rya Total CAF Confederation Cup 2019-2020

Bimwe mu byo wamenya kuri Proline FC izahura na AS Kigali:

Ikipe ya Proline FC irakomeye muri Uganda kuko iheruka gutwara igikombe cy’igihugu ndetse ikaba inafite itike yo kuzakina Total CAF Confederation Cup 2019-2020. Ubwo iyi kipe iherutse mu Rwanda, abakinnyi bayo yafashe umwanya bajya ku rwibutso basobanurirwa amateka yaranze u Rwanda mbere na nyuma ya Jenoside no muri Jenoside yakorewe Abatutsi aho abarenga miliyoni bishwe mu gihe cy’iminsi ijana (100). Icyo gihe aba bakinnyi bari basoje urugendo muri CECAFA Kagame Cup 2019.


Proline Fc yakuyemo Masters Security mbere yo guhura na AS Kigali

Proline FC ni ikipe yashinzwe mu 2006 ihita inatangira guhatana mu cyiciro cya mbere muri shampiyona ya Uganda mu 2007 icyo gihe bahise batumira Rio Ferdinand wahoze ari kapiteni wa Manchester United araza bakora ibirori byitabiriwe na Yoweri K.Museveni Perezida w’igihugu cya Uganda.

Iyi kipe yahise ikomerezaho ikina imyaka irindwi (7) iri mu cyiciro cya mbere ariko biza kwanga mu mwaka w’imikino 2013-2014 ubwo yasozaga ku mwanya wa 15 ihita imanuka mu cyiciro cya kabiri (Uganda Big League).

Mu 2016, Proline yasoje imikino ya shampiyona ya Big League ihagaze neza ikina umukino wa kamara mpaka (Playoff) itsinda Sporting United ibitego 4-1 binarangira Idrissa Lubega wa Proline FC abaye uwatsinze ibitego byinshi mu cyiciro cya kabiri bahita bazamuka bemye.

Shampiyona ya 2017-2018 ntabwo yababereye nziza mu cyiciro cya mbere kuko barongeye baramanuka ubwo bananirwaga gutsinda URA mu mukino wagombaga kubaha itike yo kuguma mu cyiciro cya mbre.

Proline FC yongeye kwitwara neza mu cyiciro cya kabiri 2018-2019 inatwara igikombe itsinze Wakiso Geants FC igitego 1-0 ku munsi wa nyuma w’iyi shampiyona bita Big League.


Proline FC ubwo bishimiraga igikombe cy'igihugu cyatumye baza muri Total CAF Confederation Cup 2019-2020

Proline FC yaje muri CECAFA Kagame Cup 2019 ibicyesha gutwara igikombe cy’igihugu 2019 itsinze Elgon Group penaliti 5-4 nyuma y’uko umukino usanzwe wari warangiye banganya igitego 1-1. Muri CECAFA Kagame Cup 2019, Proline FC yari mu itsinda rimwe na APR FC ariko iyi kipe yo muri Uganda yaviriyemo mu matsinda.








Inyarwanda Art studio
Inyarwanda BACKGROUND