Nyamasheke: Ikamyo yari itwaye ibitoro yahiriye imbere ya station ya Essence

Gilbert Karasira utuye hafi y'aho iyi mpanuka yabereye mu murenge wa Kanjongo mu karere ka Nyamasheke yabwiye BBC ko yakanguwe n'induru y'abaturanyi bavugaga ko umuriro ubasatiriye.

Avuga ko ari ikamyo yari mu muhanda wa Karongi - Rusizi yerekeza i Rusizi itwaye ibitoro ndetse byahise bimeneka hose mu muhanda no hanze yawo bigatera ikibatsi kinini.

Iyi kamyo yahiriye muri metero nkeya uvuye kuri 'station ya essence', ubwoba bwari bwinshi ko nayo ishobora gufatwa nk'uko Karasira abivuga.

Uwari utwaye iyi kamyo n'abamufasha babashije kuyivamo itaragurumana nk'uko umuturage abyemeza.

Umuyobozi w'umurenge wa Kanjongo Juvenal Cyimana yabwiye BBC ko iyi mpanuka y'ikamyo itwaye ibitoro nta muntu yahitanye.

Bwana Cyimana avuga ko iyi mpanuka yabaye ahagana saa kumi n'imwe n'igice z'igitondo, ko nta kindi kintu cyafashwe n'umuriro uretse yo ubwayo.

Bwana Karasira avuga ko abaturage bagize ubwoba kubera umuriro mwinshi wakurikiraga aho ibitoro byamenetse hose batinya ko wafata n'ibindi bice bibegereye.

Avuga ko haje kubaho ubutabazi umuriro bakawuzimya.

Ku mpanuka z'imodoka zitwaye ibitoro abaturage bagirwa inama yo kwirinda kujya kubiyora aho byametse kubera ko umuriro ushobora kubahita. Impanuka nk'izi zagiye zihitana benshi muri Afurika.

 Src: BBC