Bigoranye Liverpool yatwaye igikombe cya UEFA Super Cup 2019 itsinze Chelsea

Wari umukino watangiye ikipe ya Chelsea idahabwa amahirwe yo kuba yakwegukana iki gikombe, nyuma y’uko inyagiwe ibitego bine ku busa na Manchester United ku mukino wo ku munsi wa mbere wa shampiyona y’u Bwongereza.  Liverpool yo yahabwaga amahirwe nyuma y’uko itangiye neza shampiyona, aho yatsinze Norwich ibitego 5-1.

Abakinnyi ba Liverpool bishimira gutwara igikombe

Nubwo Chelsea itahabwaga amahirwe ku rupapuro yaje kwitwara neza kuko ku munota wa 36 Olivier Giroud yayiboneye igitego cya mbere maze ibintu biza guhinduka, iyi kipe ibona ko byose bishoboka aho igice cya mbere yakinnye neza iza kukirangiza iri imbere 1-0.

Ikipe ya Liverpool yikinaga neza ariko abakinnyi bayo bakagaragaza umunaniro mwinshi. Nyuma y’iminota itatu igice cya kabiri gitangiye ku munota wa 48 Sadio Mane yaje kuyibonera igitego cyo kwishyura. Nyuma yo kwishyura ibintu byabaye nk’ibihindutse, aho Liverpool yagarutse mu mukino itangira kwataka Chelsea.

Liverpool yashoboraga kubona igitego mu minota ya nyuma, nyuma y’uko Sadio Mane asigaranye n’umuzamu wa Chelsea ariko umupira aza kuwutera hejuru y’izamu. Iminota 90 y’umukino yarangiye maze umusifuzi yongeraho iminota itatu ariko amakipe yombi ntiyabasha kwisobona irangira ari 1-1.

Sadio Mane watsinze ibitego bibiri muri uyu mukino

Haje kwiyambazwa iminota ya kamarampaka (Extra -Time) ku munota wa 95 w’umukino Sadio Mane yaje kubona igitego cya kabiri cya Liverpool cyikaba n’igitego cye cya kabiri. Ku munota 101 Chelsea yaje kubona penaliti maze Jorginho ayinjiza neza biba 2-2. Imonta 120 y’umukino yarangiye amakipe yombi anganyije 2-2.

Abakinnyi b'ikipe ya Liverpool bishimira kuba batwaye igikombe batsinze kuri Penaliti

Haje kwiyambazwa penaliti aho Liverpool yegukanye UEFA Super Cup 2019 itsinze Chelsea penaliti 5-4. Uyu mukino twawukurikiranye kuri Canal+.