Inyarwanda art Studio
Kigali

Umugore n'umwana we bakize Ebola berekanywe i Goma muri Congo

Yanditswe na: Kaliza Liliane
Taliki:13/08/2019 15:42
0

Abashinzwe ubuzima muri Congo hamwe n'ishami ry'Umuryango w'Abibumbye ryita ku buzima, muri iki gitondo i Goma muri Congo bagaragaje Eben-Ezer na nyina Espérance bakize Ebola.



Iyi ndwara y'icyorezo imaze guhitana abantu barenga 1800 mu Burasirazuba bwa Congo kuva yakwaduka mu kwezi kwa munani umwaka ushize. Uyu munsi abahanga muri siyansi bemeje ko hari imiti ine yageragejwe ku barwayi muri Repubulika ya Demokarasi ya Congo ikagaragaza ubushobozi bwo kubakiza.

Umugore n'umwana we, ni babiri mu bantu bane bafashwe na Ebola mu mujyi wa Goma, babiri bandi yarabahitanye. Mu bo yahitanye harimo umugabo we, uyu yari abaye umuntu wa kabiri basanzemo Ebola mu mujyi wa Goma.

Eben-Ezer utaruzuza imyaka ibiri na nyina Espérance bamaze iminsi bavurirwa mu kigo cyagenewe kwita ku bafashwe n'abakekwaho iki cyorezo i Goma.

Ni inkuru nziza ku bakozi bo mu nzego z'ubuzima no ku baturage b'imijyi ya Goma na Gisenyi mu Rwanda ubu itakigenderanira nk'ibisanzwe kubera ubwoba bw'iki cyorezo.

Uyu munsi berekanywe mu kiganiro n'abanyamakuru i Goma nk'abantu bakize Ebola bakijijwe n'imiti iri mu igeragezwa. Bamwe bagaragaje ibyishimo byabo ku mbuga nkoranyambaga.

Src: BBC








Inyarwanda BACKGROUND