MTN
Kigali

Abifuza kuzamurika imideri muri Rwanda Cultural Fashion Show bahamagariwe kwiyandikisha

Yanditswe na: Emmy Nsengiyumva
Taliki:23/07/2019 11:45
0

Ibirori ngarukamwaka bya Rwanda Cultural Fashion Show [RCFS], byibanda ku kwerekana imyambaro yambarwaga mu Rwanda rwo ha mbere bigiye kuba ku nshuro ya karindwi. Kuri ubu abifuza kuzamurika imideri muri ibi birori bahamagariwe kwiyandikisha mu gihe habura amezi macye cyane ngo ibi birori bitahe.



Ibi birori byatangiye mu 2012, uyu mwaka byitezwe ko bizitabirwa n’abamurika imideli bari hagati ya 40 na 50 ndetse n’abayihanga bari hagati ya 15 na 20 baturutse hirya no hino mu Rwanda no hanze. Bitandukanye n’indi myaka, iby’uyu mwaka bifite uko byihariye. Abamurika imideli bo mu Rwanda no hanze y’u Rwanda bahawe umwanya ku buryo bazaza mu itoranywa ry’abazamurika imideli [casting] bigiye kuba mbere ho gato y’uko igitaramo nyir’izina kiba.

Abazamurika imideri bagiye gutoranywa mu gikorwa kizaba tariki 27 Nyakanga 2019 guhera saa yine z’amanywa kugeza saa kumi n’imwe z’umugoroba kuri Great Season. Kwiyandikisha ni amafaranga ibihumbi bitatu (3000frw) ku muntu wifuza kuza guhatana naho abifuza kuzajya kureba uko bahatanira imyanya yo kuzamurika imideri kwinjira ni 2000frw.


Abanyamideri bahamagariwe kwiyandikisha

Rwanda Cultural Fashion Show izaba iminsi itatu izahuza abantu batandukanye bafite aho bahuriye n’imideli. Tariki 26 Nzeli 2019, hazaba ari ku munsi wa mbere wa Rwanda Cultural Fashion Show (RCFS) aho izahuza abantu bazaba bitabiriye bajye gusura abantu batandukanye bahanga imyambaro. Ku munsi wa kabiri, ku wa 27 Nzeli 2019, hazabaho ikiganiro cyo kuvuga ku bikorerwa mu Rwanda ndetse n’izindi nsanganyamatsiko zijyanye cyane n’umuco gakondo.

Ku munsi wa gatatu ku wa 28 Nzeli 2019 ni bwo hazabaho igitaramo gikomeye kizamurikirwamo imyambaro Gakondo, kizatangira saa kumi n’ebyiri kikarangira saa yine. Ibikorwa byo kwandika abanyamideli bikorerwa ku rubuga (www.rcfs.rw), rubafasha kumenyekana, bivuze ko umunyamideli wese wiyandikishije bamukurikirana bakazamufasha mu mahugurwa bateganya mu gihe kiri imbere ndetse akazaba umwe mu bazitabira igikorwa cyo gutoranya abanyamideli bazifashishwa muri RCFS uyu mwaka.








Inyarwanda Art studio
Inyarwanda BACKGROUND