Ebola yageze mu mujyi wa Goma muri Kongo

Uyu mujyi uhana imbibi n'umujyi wa Gisenyi mu Burengerazuba bw'u Rwanda, Minisiteri y'ubuzima yamenyesheje ko hari umupasitoro wasuzumwe bagasanga afite iyi ndwara ubwo yari ageze i Goma ejo ku cyumweru aje n'imodoka itwara abagenzi.

Iyi minisiteri ariko ivuga ko ibyago byo gukwirakwiza iyi ndwara mu mujyi wa Goma biri hasi, Abantu barenga 1,600 bamaze kwicwa na Ebola kuva yakwaduka mu burasirazuba bwa Kongo mu mwaka ushize. Uyu mupasitoro yageze i Goma avuye kuri kilometero 200 i Butembo, aha hakaba hari abantu bafashwe n'iyi ndwara.

Itangazo rya minisiteri y'ubuzima muri Congo rigira riti: "Kubera uburyo uyu murwayi yabonetse akanashyirwa mu kato vuba, ibyago ko iyi ndwara ikwirakwira mu mujyi wa Goma biri hasi". Biravugwa ko umushoferi n'abagenzi 18 yari atwaye baza gukingirwa kuri uyu wa mbere. Umujyi wa Goma umaze igihe witeguye guhangana n'iyi ndwara.

Umujyi wa Gisenyi mu Rwanda bisa n'ibifatanye, nawo hashize igihe witegura guhangana na Ebola mu gihe yahagera. Ebola yandura iyo umuntu akoranyeho n'inyamaswa cyangwa umuntu uyirwaye, cyangwa akoze ku murambo w'uwo yishe. Yandura vuba kuko amatembabuzi yose kandi macye y'uyirwaye ashobora kwanduza utayirwaye uyakozeho.

Src: BBC