Umuhanzikazi Roseline Tuyishimire uzwi nka La Rose usanzwe uba mu gihugu cya Norvège yashyinguye umubyeyi we Apotre Izabiriza Violette wari uherutse gutabaruka mu minsi ishize. Nyakwigendera Apotre Izabiriza yitabye Imana azize uburwayi mu gitondo cyo ku itariki 10 Kamena 2019 akaba yashyinguwe kuri uyu wa 26 Kamena 2019.
Umuhango wo guherekeza Nyakwigendera wabaye kuri uyu wa Gatatu tariki 26 Kamena 2019 ubimburirwa n’umuhango wo gufata umurambo mu bitaro bya Kanombe wakurikiwe n’umuhango wo gusezera bwa nyuma kuri Nyakwigendera wabereye ku Muyumbo, hakurikiraho umuhango wo gusabira Nyakwigendera wabereye muri ADEPR Bibare, nyuma bamuherekeza ku irimbi rya Rusororo.
Muri uyu muhango wo guherekeza Nyakwigendera hagaragaye umuhanzikazi Clarisse Karasira, byanavuzwe mu buhamya ko yafanwaga na Nyakwigendera. Karasira Clarisse yabwiye Inyarwanda ko atazibagirwa na mba uyu mubyeyi. Mu butumwa yoherereje umunyamakuru wa Inyarwanda Clarisse Karasira yagize ati”Uyu mubyeyi sinabona icyo muvugaho kimukwiriye, yankunze cyane tutaziranye ambera nkomezi ankundira inganzo ampa ibye mbese.”
Umuhanzikazi La Rose ubwo yari aherekeje umubyeyi we bwa nyuma yavuze ko yatojwe na mama we kuba intwari ndetse anashimira Imana yabashoboje kuza gushyingura uyu mubyeyi mu Rwanda
Clarisse Karasira yakoje agira ati” Yahoraga akunda kumva indirimbo zanjye Giraneza na Ntizagushuke bikaba ibindi,..Duherukana kuri telefone muririmbira indirimbo yitwa Ingabire namutuye ngo anezerwe. Ni bigari, urukundo rwe rwarandenze niyigendere. Yanguriye impano nziza ngo azayinzanira kuri munsi wanjye w’amavuko tariki 22 Kamena 2019 none uwo munsi koko ni bwo yagejejwe mu Rwanda atakiri muzima.”
Nyakwigendera Apotre Izabiriza Violette yavutse tariki 20 Ukwakira 1956, yitaba Imana tariki 10 Kamena 2019 azize uburwayi. Apotre Izabiriza Violette ni umubyeyi w’umuhanzikazi La Rose ukora umuziki wo kuramya no guhimbaza Imana. La Rose azwi cyane mu ndirimbo ‘Gushima’ yakoranye na Serge Iyamuremye.
Eng
RSS 
TANGA IGITECYEREZO