Tuyisenge ushakwa n’ikipe yo muri Angola, yishimiye ibyo amaze gufasha Gormahia FC

Nyuma yo gufasha Gormahia FC gitwara igikombe cya shampiyona 2018-2019, Tuyisenge Jacques yanyuze ku rubuga rwa Twitter agaragaza ibikorwa bikomeye amaze gufasha ikipe ye mu mikino ya shampiyona.

Tuyisenge avuga ko ari iby’agaciro gakomeye kuba mu myaka itatu y’imikino iheruka, nka Gormahia FC batwaye ibikombe byose bya shampiyona muri iyo myaka itatu (2016-2017, 2017-2018 na 2018-2019).

Mu magambo ye, Tuyisenge yagize ati “Ishimwe ni iryawe Mana kuba ntwaye igikombe cya shampiyona ya Kenya ubugira gatatu (3) bwikurikiranya. Murakoze umuryango mugari wa Gor’Mahia FC”.

Moustapha Francis (Ibumoso) na Jacques Tuyisenge (Iburyo) bishimra igikombe 

Gormahia FC bishimira igikombe cya 18 cya shampiyona

Gormahia FC yahawe igikombe cya shampiyona kuko mu mikino 33 bamaze gukina ifite amanota 71 mu gihe Bandari FC iri ku mwanya wa kabiri. Shampiyona irabura umukino umwe ngo irangire, bivuze ko ni yo Gormahia FC yatsindwa ntacyo byayitwara kuko mbere y’uyu mukino yarushaga Bandari FC amanota umunani.

Gormahia FC yatwaye igikombe cya shampiyona 2018-2019 nyuma yo kunganya na Posta Rangers igitego 1-1 i Machakos

Jacques Tuyisenge kuri ubu nyuma yo gutwara igikombe cya shampiyona 2018-2019 akaba yari yanafashije Gormahia FC kugera mu mikino y’amatsinda ya Total CAF Confederation Cup 2018-2019, ikipe ya Petro Atletico de Luanda (Angola) banahuye muri iyi mikino yagaragaje ko imwifuza ndetse ikaba yiteguye gutanga ibihumbi 150 by’amadolari ya Amerika (US$ 150,000 ), amadolari asaga miliyoni 135 z’amafaranga y’u Rwanda (135,000,000 FRW).

Jacques Tuyisnge yagaragaje umubare gatatu (3) ungana n'ibikombe bya shampiyona amaze gutwara muri Gormahia FC

Mu bitangazamakuru bitandukanye bikorera muri Kenya baravuga ko ikipe ya Gormahia FC yiteguye kwakira ugushaka kwa Petro bityo Tuyisenge akaba yagenda nubwo we nka nyiri ubwite nta kintu arabitangazaho na kimwe.

Jacques Tuyisenge yashimye Imana n'umuryango mugari wa Gormahia FC mu myaka itatu amaze muri iyi kipe

Abakurikiranira hafi uyu mukinnyi bavuga ko kuba yafashe igihe agashimira abafana n’umuryango mugari wa Gormahia FC ku byo bamaze kugeraho, ngo byaba ari ikimenyetso simusiga cy’uko byaba ari ukubasezeraho mu buryo buteruye neza.

Jacques Tuyisenge yamenyekanye cyane akinira Police FC (2011-2015) aho yavuye agana muri Gormahia FC. Tuyisenge kandi yakiniye ikipe ya Etincelles FC na Kiyovu SC mbere yo kujya muri Police FC.