Rwema Denis wari umujyanama wa Charly na Nina yerekeje muri The Mane

Rwema Denis yamamaye mu myaka itambutse ubwo yafashaga itsinda rya Urban Boys rikibarizwa muri Super Level, nyuma baje gutandukana ndetse biba inkuru ndende mu itangazamakuru dore ko yashinjaga abagize iri tsinda ubwambuzi n’ubuhemu. Nyuma yo gutandukana n’aba basore yiyunze kuri Muyoboke Alex bafatanya gufasha itsinda rya Charly na Nina.

Rwema yamenyekanye afasha Urban Boys

Ntabwo byafashe igihe cyane ko ubwo iri tsinda ryatandukanaga na Muyoboke Alexis ryasigaye rikorana na Rwema Denis mu buryo butigeze butangazwa cyane, aha bakaba batarigeze batangaza ko uyu ari we wasimbuye Muyoboke Alex n'ubwo abakurikiranira hafi umuziki bataburaga guhamya ko ari we usigaye ari umujyanama w’aba bahanzi akaba n’ukurikirana inyungu zabo.

Amakuru agera ku Inyarwanda ahamya ko Rwema Denis yamaze kwerekeza muri The Mane aho yagizwe umujyanama “Manager” w’iyi nzu ibarizwamo abahanzi barimo; Safi Madiba, Queen Ca, Marina na Jay Polly. Aya makuru kandi yahamijwe na Bad Rama umuyobozi wa The Mane wemereye inyarwanda.com ko ubu Rwema yinjiye muri The Mane icyakora ibijyanye n’amasezerano basinyanye yo yirinda kubigarukaho.

Rwema yari yariyunze kuri Muyoboke Alex bakajya bafatanya gukorana n'itsinda rya Charly na Nina biza kurangira Muyoboke avuyemo Rwema asigara ariwe ufatanya n'iri tsinda, none nawe yamaze gutandukana naryo,...

Mu kiganiro yahaye Inyarwanda Bad Rama byumvikanaga ko atunguwe no kumva ko umunyamakuru yamenye aya makuru yagize ati” Ni byo Rwema yinjiye muri The Mane ubu ni we Manager wacu.” Uyu mugabo yatangaje ko byinshi ku masezerano bagiranye bizatangazwa mu minsi iri imbere. 

Muri The Mane, Rwema agiye kongera gukorana na Safi Madiba bigeze gukorana bya hafi ubwo yari mu itsinda rya Urban Boys,...

Kugeza ubu Rwema Denis ni Manager wa The Mane mu gihe Bad Rama we ari nyiri iyi nzu “CEO” akaba aje kunganira abakoreramo mu buryo bwo kongera imbaraga no kubyaza umusaruro ibikorwa bya The Mane.