iTel
Kigali

FERWAFA yahannye Albert Mphande igihe cy’amezi ane anacibwa amafaranga

Yanditswe na: Mihigo Saddam
Taliki:15/03/2019 18:56
0

Albert Mphande wari umutoza mukuru wa Police FC kuva hagati mwaka w’imikino 2017-2018, yahawe amezi ane (4) na FERWAFA atagaragara mu kazi ko gutoza nyuma y’ikosa yakoze ryo gusagarira abasifuzi ubwo yari amaze gutsindwa n’Amagaju FC ku munsi wa 19 wa shampiyona.



Albert Joel Mphande yahanishijwe igihano cy’amezi ane (4) adatoza ndetse akanatanga ibihumbi 50 by’amafaranga y’u Rwanda (50,000 FRW) nk’uko bigaragara ku rubuga rwa FERWAFA.

Ibihano bya FERWAFA bije bisanga n’ubundi uyu mutoza ari mu bihano bingana n’igihe iyi kipe yari kuzakinamo imikino itatu n’ubwo umwe wamaze gukinwa bakanatsindwa na Musanze FC ibitego 2-0.

Tariki ya 7 Werurwe 2019 nibwo Police FC yatsindwaga n’Amagaju FC ibitego 2-1 mu mukino w’umunsi wa 19 wa shampiyona 2018-2019. Nyuma y’umukino, Mphande yagaragaye asatira Faradji Muhire wasifuraga ku ruhande ngo amubaze icyatumye yanga igitego cya Police FC cyari cyatsinzwe na Ndayishimiye Antoine Dominique.


Ubwo Albert Mphande yageragezaga gushaka kugera ku musifuzi wasifuye ikosa 

Bitewe n’uburakari yari afite nibwo abashinzwe umutekano ndetse n’abakozi bakorana mu ikipe ya Police FC bamufashe mu maboko bamubuza kuba yagira uwo akoraho.

Nyuma yaho FERWAFA yakiriye raporo y’abasifuzi na komiseri w’umukino, akanama gashinzwe imyitwarire muri iri shyirahamwe kanahagarariwe na Mabano Jules kaje gusanga Albert Mphande agongwa n’ingingo ya 23 iri mu mategeko ahana imyitwarire mibi . Iyi ngingo yamuhanishije igihano cy’amezi ane (4) no gutanga ibihumbi 50 by’amafaranga y’u Rwanda (50,000 FRW) agomba gutangwa mu buryo bwihuse.


Muhire Faradji wasifuye ko habayeho kurarira 

Albert Mphande yageze muri Police FC  mu mpera za Mata 2018 asanga shampiyona 2017-2018 igeze mu mikino icumi (10) ya nyuma.

Kuri ubu mu mwaka w’imikino 2018-2019 yari amaze kuyishyira ku mwanya wa gatanu n’amanota 31 mu mikino 19 ya shampiyona. Kuri ubu Police FC iri gutozwa na Nshimiyimana Maurice bita Maso na Maniraguha Claude umutoza w’abanyezamu.


Ubwo Albert Mphande yajyanwaga mu rwambariro 




Umwanditsi

Mihigo Saddam

-

Sura Umwanditsi Nyandikira



Inyarwanda BACKGROUND

Copyright © 2008-2019 Inyarwanda Ltd
RSS