RFL
Kigali

Ulimwengu Jules yafashije Rayon Sports gutsinda Etincelles FC, Police FC yihimura kuri AS Muhanga-AMAFOTO

Yanditswe na: Mihigo Saddam
Taliki:19/02/2019 20:02
1


Ulimwengu Jules umukinnyi mushya muri Rayon Sports wavuye muri Sunrise FC yafashije iyi kipe ayitsindira igitego kimwe mu mukino batsinzemo Etincelles FC igitego 1-0.



Ni igitego cyabonetse hakiri kare kuko ku munota wa 11’ ni bwo Ulimwengu Jules yafunguraga amazamu biba ari nako umukino urangira.


Etincelles FC yari ifite umukino utari mubi ushingiye hagati mu kibuga, yaje kubona igitego cyashyizwe mu izamu na Rachid Mutebi ariko abasifuzi baracyanga. Iki gihe, Hakizimana Abdoulkalim wakinaga inyuma iburyo muri Etincelles FC yakoze umupira umusifuzi wo ku ruhande amanika igitambaro yerekana ko habaye ikosa, umusifuzi wo hagati amwemeza ko nta kosa ryabaye, Rachid Mutebi yahise yakira umupira uvuye kwa Hakizimana Abdoul Kalim, arangenda acika Manzi Thierry birangira igitego kigeze mu izamu.



Rachid Mutebi yishimira igitego




Igitego bacyanze biteza impaka


Abasifuzi n'abakapiteni


Abakinnyi ba Rayon Sports bishimira igitego cya Ulimwengu Jules


Ulimwengu Jules yakinaga umukino we wa mbere muri shampiyona afasha Rayon Sports

Abakinnyi ba Etincelles FC bahise bishimira igitego ariko bakiri muri ibyo byishimo, abafana ba Rayon Sports bazamura amajwi bavuga ko batemera ibibaye, ni bwo abasifuzi bateranye bahita bemeza ko igitego bari banditse atari ukuri bityo ko ari igitego kimwe cya Rayon Sports ku busa bwa Etincelles FC.



Sarpong Michael azamukana umupira

Nduhirabandi Abdoulkalim bita Coka umutoza mukuru wa Etincelles FC n’abakinnyi be bahise basa nk'aho babuze uko babyakira biba ngombwa ko birunda ku basifuzi ariko birangira igitego cyabo cyanzwe burundu, umukino urakomeza.


Mugheni Kakyle Fabrice arekura umupira

Mu buryo Rayon Sports yari mu rugo yakinnyemo (System), byari uburyo bugezweho bwo gukoresha abugarira batatu (Back-Three). Habimana Hussein, Manzi Thierry na Mutsinzi Ange bari inyuma bamenya buri kimwe.

Nyandwi Saddam yabazwaga gahunda zose z’iburyo ari nako Eric Rutanga Alba abazwa ibumoso. Mugheni Kakule Fabrice wahawe ikarita y’umuhondo na Niyonzima Olivier Sefu bakinaga hagati bari inyuma ya Ulimwengu Jules na Sarpong Michael. Mpazimpaka Andre yari mu izamu.


Abakinnyi 11 ba Rayon Sports babanje mu kibuga

Etincelles FC bari bafite abakinnyi bane inyuma kuko Hakizimana Abdoul Karim , Nahimana Isiaka, Nshimiyimana Abdoul na Rucogoza Aimable Mambo bari mu bwugarizi. Turatsize Heritier n’Uwimana Guilain bari hagati mu kibuga.

Muganza Kaliba Joachim yakinaga inyuma ya Rachid Mutebi, Ngabo Mucyo Fred agaca ibumoso naho Nduwimana Michel agaca iburyo. Nsengimana Dominique yari mu izamu.


Abakinnyi 11 ba Etincelles FC babanje mu kibuga

Abakinnyi ba Rayon Sports wabonaga ko batinze kwibona mu mukino cyane hagati mu kibuga kuko Niyonzima Olivier Sefu atagize uruhare runini mu gutuma Rayon Sports ibona imipira myinshi mu gice cya mbere. Ibi byatumye Nyandwi Saddam asigarana akazi ko kujya agemura imipira mu busatirizi bituma anaruha vuba ahita asimburwa na Mugisha Gilbert mu gice cya kabiri.


Mudeyi Suleiman yari yagarutse mu bakinnyi 18 nyuma y'imvune yari yarakuye mu mukino wa FC Musanze

Rayon Sports kandi bongeye gusimbuza ubwo Bukuru Christophe yasimburaga Jonathan Rafael da Silva.


Nyandwi Saddam yari yagarutse muri 11 kuko Iradukunda Eric Radou yari afite amakarita 3 y'umuhondo

Ku ruhande rwa Etincelles FC, Uwimana Guilain asimburwa na Niyonsenga Ibrahim, Muhanuka Eric wanahawe ikarita y’umuhondo yasimbuye Nduwimana Michel, Niyibizi Ramadhan asimbura Ngabo Mucyo Fred.

Rayon Sports irakomeza kuguma ku mwanya wa gatatu n’amanota 34 mu gihe Mukura VS iri ku mwanya wa kabiri n’amanota 37 kuko yatsinze Sunrise FC igitego 1-0 i Nyagatare. APR FC ni iya mbere n’amanota 38 nyuma yuko yatsinze Amagaju FC ibitego 2-1.




Rucogoza Aimable Mambo wahoze muri FC Bugesera FC ubu ari muri Etincelles FC yanakinnye umukino yagiriyemo igikomere ku mutwe

Ikipe ya Police FC yatsinze AS Muhanga ibitego 3-1 mu mukino w’umunsi wa 16 wa shampiyona nyuma y'uko mu mukino ubanza AS Muhanga yari yatsinze Police FC ibitego 2-1. Ibtego bya Police FC byatsinzwe na Ndayishimiye Antoine Dominique (1) na Songa Isaie (2). Igitego cya AS Muhanga cyatsinzwe na Lulihoshi Aksante Dieu Merci.Police F iri ku mwanya wa kane n’amanota 27.


Abafana ba Rayon Sports kuri sitade ya Kigali

Mu yindi mikino, Bugesera FC yaguye miswi na FC Marines banganya 0-0 i Nyamata. Mukura VS itsinnda Sunrise FC igitego 1-0.





Abafana ba Rayon Sports umukino warangiye bagifite ubwoba ko bakwishyurwa


Umukino utaha Rayon Sports izajya gusura Mukura VS i Huye

PHOTOS: Saddam MIHIGO (Inyarwanda.com)






TANGA IGITECYEREZO

Izina ryawe
Email yawe
Andika igitecyerezo

IBITECYEREZO

  • nzungu5 years ago
    Ndabona uwomukinnyi atajyiyeneza arikose wamunyeberezire aracyari mu reyo esereyo irikumwanyawakangahe ikigikombe nicyacu ?





Inyarwanda BACKGROUND