iTel
Kigali

Ibintu bishobora gutuma umukobwa ahera iwabo

Yanditswe na: Kaliza Liliane
Taliki:11/02/2019 11:55
1

N'ubwo hariho inzitizi ku rubyiruko muri rusange zituma batubaka ingo, usanga akenshi abakobwa aribo bigiraho ingaruka ziremereye, kuko bo hari n’igihe bibaviramo guhera iwabo ntibarongorwe, bitandukanye no ku basore, kuko umusore we igihe cyose yabishakira yafata icyemezo cyo kurongora kandi ntabure umugore.



Aha rero turarebera hamwe by’umwihariko zimwe mu mpamvu zikomeye zishobora gutuma umukobwa ahera iwabo n’umuti wazo.

KUBENGA CYANE

Kubenga cyane ni imwe mu mpamvu zishobora gutuma umukobwa ahera iwabo, usanga hari abakobwa benshi babura abagabo babarongora kubera kubenga cyane. Iyo umukobwa abenze abasore 2 cyangwa 3, akenshi biramenyekana ugasanga n’abandi basore baramutinya, kubera ko baba bumva ntacyo barusha bagenzi babo babenzwe, ibyo bikagabanyiriza uwo mukobwa amahirwe yo kurambagizwa; uko iminsi igenda itambuka ugasanga mu minsi mike wa mukobwa arashaje, abasore bakamwanga, na ba bandi yabenze akababura, bikaba byamuviramo guhera iwabo. Akenshi igitera umukobwa kubenga abasore, aba ashaka uwisumbuyeho, akenshi bitewe no kwifuza cyangwa kurarikira ubutunzi cyane.

Usanga hari n’abakobwa batazi urwego bariho, ku buryo baba bumva bazarongorwa n’abasore b'abakire cyane, bikabatera kubenga abari ku rwego rwa bo, mu minsi mike bakaba barashaje, bakifuza ba bandi babenze bitagishoboka. Inama ku bakobwa rero, ni ukumenya urwego buri wese ariho. Urwego uriho nk’umukobwa ntururebera ku buranga bwawe, amashuri ufite, cyangwa ku basore ukunda ; ahubwo nk'uko twamaze kubibona, umugabo ugukwiriye: umurebera mu basore bagukunda, maze nawe ugahitamo umwe mu bagukunda, aho gutegereza kuzarongorwa n’abo ukunda.

KWIYANDARIKA

Kwiyandarika ni imwe mu mpamvu zishobora gutuma umukobwa ahera iwabo, kwiyandarika biri mu buryo 2: hari ukwiyandarika mu busambanyi, hari no kugira umwanda.

KWIYANDARIKA MU BUSAMBANYI

Kugendera mu nzira z’ubusambanyi ni imwe mu mpamvu zikomeye zishobora gutuma abakobwa batabona abagabo; ikibabaje cyane, ni uko abasore aribo bagira uruhare runini mu kwandarika abakobwa, kandi nabo bagahindukira bakabibangira. Nta musore wishimira gushakana n’umukobwa w’indaya cyangwa wakoze akazi k’uburaya, kandi aribo babandarika muri izo ngeso mbi. 

Ubusanzwe biba byiza iyo umukobwa arongowe akiri isugi nk'uko twabibonye, umukobwa wagendeye mu ngeso z’ubusambanyi cyane, biragoye ko yabona umugabo uzamushimisha mu mibonano mpuzabitsina, kubera ko aba yarahuye n’abagabo benshi kandi bakora imibonano mpuzabitsina mu buryo butandukanye. Kandi abasore banatinya ko nyuma yo kumugeza mu rugo, ashobora gukomeza za ngeso z’ubusambanyi yahozemo. Birumvikana rero ko ubusambanyi ku bakobwa bushobora gutuma batabona abagabo.

UMWANDA

Nk'uko twabibonye, uburanga ni cyo kintu cya mbere abasore baheraho bakunda abakobwa, kandi twanabonye y'uko uburanga atari ubwo umuntu avukana gusa, hariho n’uburanga buterwa no kugira isuku, kwirimbisha, ndetse no kwiyitaho. Kandi burya isuku, kwirimbisha no kwiyitaho ku mubiri, bituma n’uburanga bwa kamere burushaho kugaragara. Hari abakobwa usanga bagira isuku bakaniyitaho ku mubiri, ariko wagera iwabo mu rugo ugasanga isuku yaho ntijyanye n’iy’umubiri we, ndetse ukibaza niba ariho iwabo bikakuyobera ; iyo umusore agusuye yaba agutunguye cyangwa yaguteguje, agasanga umwanda mu rugo iwanyu, bihita bimwereka uko isuku yo mu rugo iwe izaba imeze nakurongora ; si ibyo gusa kandi, umuntu wese ugeze mu rugo iwanyu cyangwa ahandi hantu uba nk’umukobwa, birashoboka ko hagira amakuru amenyekana amuturutseho y’isuku yasanze iwanyu, bikaba byagera no ku basore, ndetse no ku bafite gahunda yo kukurambagiza. Umwanda rero ni inkomyi ishobora gutuma umukobwa atabona umugabo.

Mu muco nyarwanda wa kera, kimwe mu bimenyetso byigaragazaga ko urugo cyangwa igipangu runaka harimo umukobwa w’inkumi ugeze igihe cyo kurongorwa, ni ugusanganirwa n’isuku ukigera hafi y'aho. Ukigera ku muharuro wenda kugera ku irembo (inzira yerekera mu rugo), ugasanganirwa n’isuku umuharuro uharuye neza, ukubuye, uteyeho indabyo, ugakomeza ku irembo ukabona hasukuye neza, ugakomeza mu rugo impande zose hasukuye neza, ugakomeza mu nzu hose ugasanga isuku ni yose! 

Uko kandi ni ko no mu mijyi byabaga bimeze iyo wageraga hafi y’igipangu runaka kirimo umukobwa ugeze igihe cyo kurongorwa. None muri iki gihe ntiwatandukanya urugo rurimo umugeni n’urwo atarimo, cyangwa igipangu kirimo umugeni n’icyo atarimo; naho usanze isuku mu gipangu usanga umukobwa akora isuku mu nzu abamo akagarukira mu muryango w’inzu abamo gusa, iby’umwanda uri mu gipangu cyangwa ukizengurutse ntacyo bimubwiye. Ibi rero kubyirengagiza nk’umukobwa ni ukwihemukira kuko ni kimwe mu bigaragaza umukobwa uzaba mutima w’urugo.

KUDASHYIKIRANA N’ABASORE

Kudashyikirana n’abasore bishobora gutuma umukobwa atabona umugabo, hari abakobwa usanga bameze nk'abatazi kuvuga, cyangwa bavugana n’abakobwa ariko bagatinya abasore cyane; ugasanga abanyuraho ntabasuhuze, banamusuhuza akikiriza yigendera cyangwa asa n’utabitayeho, rimwe na rimwe bikagaragara nk’agasuzuguro. Hari n’abatubaha abasore, ugasanga basuhuza inshuti zabo gusa, cyangwa akagusuhuza afite icyo agushakaho. Ubusanzwe mu muco mwiza wo gusuhuzanya, iyo usanze umuntu umwe cyangwa benshi ahantu (bicaye, bahagaze cyangwa bakora), ni wowe ugomba kubasuhuza, ariko bitabujijwe ko nawe bashobora kugusuhuza.

Iyo rero umukobwa ageze cyangwa anyuze ahantu hari umusore umwe cyangwa benshi, akabanyuraho cyangwa akagenda atabavugishije nta no kubasuhuza, bigaragara nk’agasuzuguro; ibyo rero uko ugenda ubikora ku bantu batandukanye by’umwihariko ku basore, ubwo buhamya bubi bugenda bukwirakwira, abantu banabubwirana, bigatuma amahirwe yo kubona umugabo aba make. Ikindi kigendanye n’umuco mwiza wo gusuhuzanya: iyo abantu bahuriye mu nzira, uworoheje ni we usuhuza ukomeye, mbese umunyacyubahiro gike ni we usuhuza umunyacyubahiro cyinshi; ariko bitabujije ko umunyacyubahiro cyinshi abishatse yasuhuza umunyacyubahiro gike.

Ku byerekeye umugore n’umugabo cyangwa umusore n’umukobwa, umugabo ni we munyacyubahiro ku mugore, kandi umusore ni we munyacyubahiro ku mukobwa, nkuko twabibonye ku byerekeye kurambagiza no kurambagizwa (mu gice cya 2). Ibyo rero bituma umukobwa unyuze ku musore ntamusuhuze afatwa nk’umunyagasuzuguro; ibyo kandi uko ugenda ubikora ku bantu batandukanye by’umwihariko ku basore, ubwo buhamya bubi bugenda bukwirakwira, abantu banabubwirana, bigatuma amahirwe yo kubona umugabo agabanyuka. Umukobwa rero akwiye kugerageza kwiyegereza abasore, gusa akirinda gukabya kugira ngo bitagaragara nabi.

Niba rero uri umukobwa ukinjira nko mu modoka itwara abagenzi, ukicara iruhande rw’umusore, mbere yo gukora ibindi byose uzabanze umusuhuze, singombwa ko muba muziranye ; nuhura n’umusore umwe cyangwa benshi ntuzakore ikosa ryo kubanyuraho utabashuhuje, ijambo rimwe gusa "mwiriwe’’ cyangwa "mwaramutse’’ rirahagije kugira ngo basigare bakuvuga neza. Gushyikirana n’abasore ndetse n’abantu bose muri rusange: bituma abasore bagutinyuka, bikakongerera amahirwe yo gukundwa cyane; kandi binakongerera ubuhamya bwiza mu bantu, abantu bakajya bagutangira ubuhamya bwiza ahantu hose.

IMYITWARIRE Y’UMURYANGO W’UMUKOBWA

Hari abakobwa bagira ikibazo cyo kutarongorwa bitewe n’imyitwarire mibi y’imiryango yabo, ushobora nko gusanga mu muryango w’umukobwa runaka bivugwa cyane ko baroga, ndetse ugasanga n’abaturanyi batinya kujya muri urwo rugo, bigatuma umuntu wese umenye ayo makuru yishisha cyane abantu bo muri uwo muryango harimo n’abakobwa baho. Ikindi umusore wese ubimenye atinya ko uwo mukobwa nawe ashobora kuba afite izo ngeso nk’iz’iwabo, akaba ashobora no kuzabimuzanira mu rugo. 

Si ibyo gusa kandi, n'iyo umusore yaba abizi neza ko uwo mukobwa adafite izo ngeso, umusore atinya ko kurongora uwo mukobwa byazamuca ku nshuti n’imiryango, kuko ntakiba kigaragariza abantu ko uwo mukobwa nta ngezo nk’iz’iwabo afite, uretse n’ibyo kandi, biroroshye cyane ko ab’iwabo bisanzura cyane mu rugo rwawe n’abarozi bakaba bahagera ku buryo bworoshye ; ibyo byose ni impungenge umusore ashobora kugira. Ibyo rero bigabanyiriza umukobwa amahirwe yo kurongorwa, ndetse bikaba byamuviramo guhera iwabo. Inama rero ku mukobwa ufite umuryango umeze gutyo: ni ukwitandukanya nawo ukajya kuba kure yawo aho inshuti zawe zitazahurira n’ayo makuru ; icyo gihe n’iyo byamenyekana ntibyagira imbaraga nyinshi nk’izo byagira ubana n’uwo muryango.

GUKUNDA UBUTUNZI CYANE

Gukunda ushingiye ku butunzi si ikosa, kuko mu rukundo rw’abashaka kurushinga, buri wese akunda kuko hari icyo yabonye ku muntu kikamutera kumukunda, ariko niba uhaye umusore urukundo, ugomba kuba wiyemeje kwihanganira impinduka zishobora kuba ku cyaguteye kumukunda, urwo ni rwo rukundo, kuko ibyo mu isi bihora bihinduka. Gukundana n’umusore uyu munsi, ejo wabona undi umurusha ubutunzi uwa mbere ukamureka gutyo gutyo, urwo si urukundo. Gukunda umusore afite ubutunzi ejo yakena ukamutera umugongo ukajya gushaka abafite ubutunzi, urwo si urukundo.

Niba umusore agusabye urukundo ugomba kumubwira 'yego’ witeguye kwihanganira impinduka zishobora kuba ku cyaguteye kumukunda, kuko urukundo rwihanganira byose. Cyakora umubenze umuhoye ibyaha cyangwa amakosa ye byo birumvikana. Iyo rero abasore bakuziho ingeso yo guhindagurikana n’ihindagurika ry’ubutunzi bw’abasore mu rukundo, cyangwa bakuziho guhindagura abakunzi bitewe n’ubutunzi bw’abasore butangana, abasore bakugendera kure kuko nta rukundo rw’ukuri bakubonamo. Ibyo rero bigatuma amahirwe yo kubona umugabo agabanyuka. Ikindi si byiza na gato kwereka umusore ko ukunda ubutunzi cyane, kuko ahita atekereza ko igihe buzaba bwabuze cyangwa bwahungabanye atazongera kukubona.

UBUTUNZI BWINSHI KU BAKOBWA

Abakobwa bafite ubutunzi bwinshi cyane, bagira amahirwe macye yo kubona abagabo; ubusanzwe umukobwa aba ashaka umugaho umurusha ubutunzi cyangwa nibura bakaba bari ku rwego rumwe. Ni byo rwose abasore baba bashaka abakobwa bafite akazi, bafite ubutunzi, bize: mbese ku buryo bazabafasha mu iterambere ry’urugo, ariko umusore ufite ubutunzi bwinshi ukeneye umugore mwiza uzamwubaha nk’umugabo mu rugo, aba ashaka umukobwa udakanganye cyane ku butunzi; ntiyashaka rero umurusha ubutunzi, kubera gutinya ko atazamwubaha, kandi koko biragoye ko umugore winjiza umutungo uruta uw’umugabo, ko yakubaha umugabo nk'uko bikwiye. 

Ubusanzwe abakobwa bafite ubutunzi bwinshi, bifuzwa cyane n’abasore b’abakene kugira ngo babazamure, ariko nabyo ni ukubura uko bagira bitewe n’ubukene, kuko nta mugabo wifuza ko umugore amurusha kwinjiza umutungo cyangwa ko banganya. Abasore b’abakene rero abo bakobwa ntibabemera. Ikindi kigoye, umukobwa ufite ubutunzi bwinshi abasore bamurusha ubutunzi ari nabo yifuza baba ari bake cyane; n’abo bake kandi bagira impungenge ko umukobwa ufite ubutunzi bungana gutyo atakubaha umugabo, bigatuma bishakira abafite ubutunzi budakanganye cyane.

Cyakora umukobwa ufite ubutunzi bwinshi akundwa n’abasore bakomeye nabo bafite ubutunzi, ariko kubyerekeye kuba bamugira umugore biba bigoye. Iyo rero ari umukobwa udasabana cyane, cyangwa asuzugura, cyangwa ari umwibone birushaho kuba bibi; cyane ko amafaranga menshi anatera ubwibone bukabije iyo nyirayo atabyitwayemo neza. Inama rero ku bakobwa bafite ubutunzi bwinshi, ni uguca bugufi cyane, ugafata abasore bose nk’abari hejuru yawe (abakomeye n’aboroheje), ibyo bibera ubuhamya n’ikimenyetso ba basore muri ku rwego rumwe, bakabona ko ubutunzi ufite butazakubuza kubaha umugabo, bityo wibonere umugabo muri ku rwego rumwe ku buryo bworoshye.

KWITUKUZA

Kwitukuza ni uburyo bwo guhindura umubiri w’igikara ugahinduka inzobe. Abagore n’abakobwa b’abirabura bakunze kubikora. Hari abitukuza umubiri wose cyangwa ibice bimwe by’umubiri. Ubusanzwe ku bantu, ibara ry’uruhu riterwa n’ingano ndetse na kamere ya melanine (mélanine: pigment colorant) umuntu afite.

Melanine ni yo igena ibara ry’uruhu n’iry’imboni y’amaso. Usanga abantu bafite mélanine nyinshi bagira uruhu n’imboni bifite ibara ryirabura. Akamaro ka mélanine ni ukurinda uruhu imwe mu mirasire y’izuba (rayons ultra violets). Iyi mirasire y’izuba izwiho gusajisha uruhu no kongera amahirwe yo kurwara kanseri y’uruhu. Dore muri make ingaruka zo kwitukuza:

1.Guhagarika no kwica melanine

2.Guhinamirana no gupfa k’uruhu

3.Uruhu rutakaza ubushobozi bwo kwiyuburura no kwigarurira itoto

4. Kurwara ibiheri mu maso no kumubiri, ibisebe bidakira n’izindi ndwara z’uruhu

5.Amabara k’umubiri hamwe hasa inzobe ahandi hirabura

6.Uruhu ruroroha cyane kuburyo ushobora kubyara ubazwe kukudoda bikanga

7.Kuzana amaribori atewe n’uruhu ruri kwangirika

8.Indwara z’uruhu zishobora kwiyongera harimo na Cancel y’uruhu

9.Kudakira igisebe mu gihe ukomeretse uruhu

10.Abitera inshinge bashobora kugira ikibazo cyo kurwara umutima kuko umuti ujya mu maraso

11.Iyo wahinduye uruhu hanyuma ukabireka uruhu ruba igikara kurenza uko rwari rumeze mbere

12.Bituma habaho kubura Vitamine z’uruhu, umuntu agasaza imburagihe

13.Cortisone irengeje urugero mu mavuta itera umuvuduko mwinshi w’amaraso (hypertension artérielle), diyabete, kanseri y’uruhu, kurwara impyiko (insuffisance rénale), kugira imihango idakurikiza umurongo (cycle irrégulier), ibibazo by’amagufa kuko corticoïdes zituma ingingo zidakomera

14.Hydroquinone, arbutine, acide kojique cyangwa acide azelaique zikunze kuba mu mavuta atukuza, zitera uburyaryate, no kumva uburibwe busa nk’ubushye ku ruhu, amabara yijimye n’ibindi.

Iyo rero umukobwa yitukuje akagerwaho n’izi ngaruka, bimugabanyiriza amahirwe yo gukundwa; n’iyo witukuje ingaruka zitaragaragara, iyo umusore akurambagije nyuma akazamenya ko witukuje ko uburanga bwawe atari umwimerere, akenshi biragoye ko uwo musore yakwihanganira mugakomeza gahunda zo kubana.

Src: bestlifeonline.com






Umwanditsi

Kaliza Liliane

-

Sura Umwanditsi Nyandikira

IBITECYEREZO

  • Ituze ngabo6 days ago
    Abakobwa barabyumva kdi bakagombye gusoma neza kugirango habeho guhindura bimwe mubyatuma bahera iwabo.

Inyarwanda BACKGROUND

Copyright © 2008-2019 Inyarwanda Ltd
RSS