BASKETBALL: Patriots BBC na REG BBC zabonye itike izihuriza ku mukino wa nyuma w’irushanwa ry’Intwari 2019

Umukino wa nyuma ugomba guhuza REG BBC na Patriots BBC biteganyijwe ko uri saa mbili z’umugoroba muri sitade nto ya Remera (20h00’). Kwinjira ni ibihumbi bibiri ahasanzwe (2000 FRW) mu gihe mu myanya y’icyubahiro ari ibihumbi bitanu (5000 FRW) kuri uyu wa Gatanu tariki ya 1 Gashyantare 2019.

Hagumintwari Steve wa Patriots BBC ahana ikosa 

Umukino wasoreje iyabaye kuri uyu wa Kane, ikipe ya Patriots BBC  yabarizwaga mu itsinda rya kabiri (B) yageze ku mukino wa nyuma kuko yatsinze APR BBC amanota 77-67 mu mukino utari woroshye ku mpande zombi. Muri iri tsinda habashije gutambuka Patriots BBC mu gihe APR BBC na UGB bagomba gutegura umwaka utaha.

Sagamba Sedar azamuka mu kirere ashaka umupira 

Muri uyu mukino, ikipe ya Patriots BBC yagaragaje imbaraga n’ubukana bw’abakinnyi bayo barimo Sagamba Sedar ushimisha abafana acenga ikipe baba bahanganye, Hagumitwari Steven, Hakizimama Lionel uba atera amanota atatu mu nkangara, Mugabe Aristide, Makiadi Ongea Michael.

Niyonkuru Pascal (5) azamukana umupira 

Agace ka mbere k’umukino karangiye Patriots BBC ifite amanota 20 ku icyenda (9) ya APR BBC mu gihe agace ka kabiri Patriots BBC yatsinze amanota 23 mu gihe APR BBC yari ifite amanota 21.

Mu gace ka gatatu ikipe ya APR BBC yaje kwihagararaho izamura amanota ku buryo hari ahi byageze Patriots BBC igwiza amanota 45 mu gihe APR BBC yari ifite amanota 42. Gusa nyuma abakinnyi ba APR BBC baje kugabanya imbaraga ubwo Niyonkuru Pascal yari amaze kugira ikibazo cy’imvune bahita batangira gutsindwa. Gusa mu gace ka gatatu APR BBC yatsinze amanota 19 mu gihe Patriots BBC yari ifite amanota 18. APR BBC yari yagiye izamura imbaraga yaje gutsinda n’agace ka nyuma (4) ifite amanota 18 kuri 16 ya Patriots BBC. Patriots BBC nta mpungenge yari kugira kuko yari yizigamye amanota menshi mu gace ka mbere.

Aime Kalim Nkusi umutoza wa APR BBC atanga amabwiriza 

Basketball ni umukino ukunzwe n'inshuti z'u Rwanda 

Muri uyu mukino, Ishimwe Parfait wa APR BBC yahize abandi mu gutsinda kuko yasaruyemo amanota 17 mu gihe Ndizeye Dieudonne wa Patriots BBC yatsinze amanota 16 ayanganya na Munyaneza Eric (APR BBC) cyo kimwe na Hagumintwari Steven (Patriots BBC).

Patriots BBC (Umweru) na APR BBC (Umukara) wari umukino w'imbaraga

Makiadi Ongea Michael (Patriots BBC) yatsinze amanota 13 naho Niyonsaba Bienvenue (APR BBC) abasha gutsinda amanota 14 mu mukino.

Uretse Patriots BBC, REG BBC nayo yageze ku mukino wa nyuka itsinze Espoir BBC amanota 100-83 (23-15,20-19, 34-29, 23-20) mu mukino wari wabanje.

Muri uyu mukino, Beleck Bell (REG BBC) yatsinze amanota 28 mu gihe Sangwe Armel (Espoir BBC) yatsinze amanota 25. Shyaka Olivier (REG BBC) yatsinze amanota 21. Kami Kabange Milambwe (REG BBC) yatsinze amanota 15 mu gihe Kazeneza Emile Galoi kapiteni wa Espoir BBC yatsinze amanota 13.

Sagamba Sedar (5) umukinnyi wa Patriots BBC yagoye cyane abakinnyi ba APR BBC