“Bariya bana bose bangirika bajya mu biyobyabwenge ni ab’umugisha”-Min.Rosemary Mbabazi

Ibi Min.Mbabazi yabitangarije mu gitaramo Korali Ambassadors of Christ yamurikiyemo alubumu ya 16 cyahujwe no kurwanya ibiyobyabwenge, igitaramo cyabaye ku Cyumweru tariki 16 Ukuboza 2018 kibera mu ihema rya Camp Kigali.

Min.Rosemary yavuze ko amafaranga atangwa ku bajyanwa Iwawa ari menshi biturutse ku kuba ababyeyi, Leta ndetse n’amatorero birengagiza inshingano zabo mu gukumira ibiyobyabwenge.

Yagize ati “…Iyo tuza kuba dukora twese inshingano zacu, ari ababyeyi ari Leta, ari Itorero aya mafaranga menshi cyane arenga miliyari arenga zingahe, twari kuba tuyubakisha amashuri, twari kuba tuyasanisha ibitaro, twari kuba twubaka ibikorwaremezo hirya no hino kuko ibindi bimeze neza,”  

Min.Rosemary Mbabazi asanga kwirengagiza inshingano kwa benshi byaratumye benshi bishobora mu biyobyabwenge.

Yavuze ko abajyanwa Iwawa bahabwa amahugurwa, bakigishwa imirimo itandukanye izabagirira akamaro mu buzima busanzwe. Avuga ko Leta ishora iby’ingenzi mu bana bayo igamije kuzamura no kubungabunga imibereho yabo.  

Ngo benshi mu banyura Iwawa bavuga ko batifuza y’uko abana babo banyura mu nzira nk’iyo banyuzemo.  Avuga ko abana bose bishobora mu biyobyabwenge ari ub’umugisha kandi ko benshi muri bo ari abahanga. Ati“…Bariya bana bose bangirika bakanywa ibiyobyabwenge ni abana b’umugisha. Ni abana b’umugisha bafite ibintu byinshi cyane ni n’abahanga,”  

Korali Ambassadors of Christ irateganya no kujya kurwanya ibiyobyabwenge Iwawa, Min.Mbabazi yababwiye ko bazabashyigikira muri uru rugendo bazakorerayo.  Yanavuze kandi ko asanzwe ari umukunzi wabo kandi ko akurikirana ibihangano byabo umunsi ku wundi. Ngo hejuru yo kuba baririmba neza bafite n’ubutumwa bw’ivugabutumwa bucengera mu mitima ya benshi.

Yavuze ko amashuri Korali Ambassadors of Christ yagezemo irwanya ibiyobyabwenge, hari benshi bumva ko ho nta biyobyabwenge bibarizwa yo, ariko ngo ingendo bahakoreye zerekanye ko na ho biriyo.  

Yakomeje avuga ko inzego zitandukanye zahagurukiye kurwanya ibiyobyabwenge nyuma y’ijambo Perezida Paul Kagame yavugiye mu nama y’Igihugu y’Umushyigikirano asaba inzego bireba gukurikirana iki kibazo.

Min.Mbabazi yunze murya Commission Bruce Munyambo avuga ko ibiyobyabwenge ari intandaro y’ibindi byaha bikorwa. Ati “…Twashyize imbaraga dutangira guhangana na byo, ibyinjira, ibikwirakwiza, ababinywa bagafatwa twagiye tubona na byabyaha bigabanuka..” 

Korali Ambassadors of Christ imaze igihe mu gikorwa cyo kurwanya ibiyobyabwenge. Ni igikorwa yakoreye mu bigo by’amashuri na Kaminuza, bavuga ko ubutumwa batanze bwagiye butunga umusaruro ku bo babusanganishije.

Muri 2016 Minisiteri y’Ubuzima yatangaje ko urubyiruko ruri hagati y’imyaka 15 na 35 rwanyoye ibiyobyabwenge inshuro imwe cyangwa nyinshi.

Commission Bruce avuga ko ibiyobyabwenge ari imbarutso y'ibindi byaha byugarije sosiyete Nyarwanda.