MTN
Kigali

Jose Mourinho yirukanywe ku kazi ko gutoza Manchester United

Yanditswe na: Mihigo Saddam
Taliki:18/12/2018 14:20
0

Manchester United ikipe iri mu cyiciro cya mbere muri shampiyona y’Abongereza yatandukanye na Jose Mourinho Umunya-Portugal wari umutoza mukuru w’iyi kipe iheruka gutsindwa na Liverpool ibitego 3-1.



Mourinho w’imyaka 55 yageze muri Manchester United mu 2016 kuri ubu akaba yari amaze gufasha iyi kipe gutwara irushanwa rya UEFA Europa League n'igikombe cya League Cup ariko kuri ubu iyi kipe yatozaga ikaba idahagaze neza kuko iri ku mwanya wa gatandatu (6) n’amanota 26 ikaba irushanwa na Liverpool amanota 19.


Jose Mourinho ntabwo akiri umutoza wa Manchester United

Ubuyobozi bw’iyi kipe bwafashe umwanzuro wo gutandukana n’uyu mugabo nyuma yuko bari bamuguriye abakinnyi 11 bari bahagaze miliyoni 400 z’amayero kugira ngo yubake ikipe. Amakuru ahari ndetse anakunze kuvugwa mu bitangazamakuru byo mu Bwongereza ni uko uyu mutoza atari akibanye neza n’abakinnyi uwa mbere akaba yari Paul Pogba ukina hagati mu kibuga.


Bamwe mu bakinnyi ba Manchester United baruhutse Mourinho...Aha yashotoraga umukinnyi wa Liverpool wari ugiye kurengura umupira

Ubutumwa bugaragara ku rubuga rwa Manchester United buvuga ko batakiri kumwe na Jose Mourinho nk’umutoza ariko ko bamwifuriza amahirwe mu kazi ke kari imbere n’umwuga we muri rusange. Jose Mourinho yatoje amakipe arimo; Benfica (2000), Uniao de Leiria (2001-2002), FC Porto (2002-2004), Chelsea (2004-2007), Inter Milan (2008-2010), Real Madrid (2010-2013),Chelsea (2013-2015) mbere yo kujya muri Manchester United (2016-2018).








Inyarwanda Art studio
Inyarwanda BACKGROUND