Kuri uyu wa Kane tariki 8 Ugushyingo 2018 nibwo byamenyekanye ko umuhanzi w'umunyarwanda Yvan Buravan yakoze amateka akegukana igihembo cya 'Prix Decouvertes' igihembo gihabwa umuhanzi wahize abandi mu bitabiriye iri rushanwa ritegurwa na radio ikomeye ku Isi yo mu Bufaransa yitwa 'RFI'.
Yvan Buravan nyuma yo kwegukana igihembo twamwegereye tugirana ikiganiro, aha umunyamakuru yasanze Yvan Buravan aho yari yagiye kwiyakirira n'abagize ikipe imufasha ya New Level. Muri iki kiganiro Yvan Buravan yamaze igihe kinini ashimira buri umwe wagize uruhare mu rugendo rwo kwegukana iki gihembo yegukanye.
Uyu muhanzi yatangaje ko ashimira bikomeye Ben Kayiranga umuhanzi w'umunyarwanda uba mu Bufaransa wamukanguriye kwiyandikisha muri iri rushanwa, anashimira buri umwe wagize uruhare ngo abashe kwegukana iki gihembo ahereye kuri New Level, inzu imufasha. Yabwiye Inyarwanda.com ko yaje kumenya amakuru ko ubwo irushanwa ryatangiraga bari abahanzi 1500 bo mu bihugu binyuranye bya Africa.
Yvan Buravan wanditse amateka yabwiye Inyarwanda.com ko yakurikiranye iri rushanwa mu buryo bwa Live kuri facebook ategereje kureba utsinda icyakora aza gutungurwa n'uko telefone yareberagaho ari yo bamuhamagayeho bityo ahita amenya ko atsinze irushanwa rye rya mbere rikaba rimwe mu marushanwa ya muzika akomeye cyane ku mugabane wa Afurika.
Yvan Buravan yegukanye igihembo cya Prix Decouvertes 2018
Twabajije uyu musore ibijyanye n'ibihembo ari bugenerwe nk'umuhanzi wegukanye iki gihembo, aha Yvan Buravan akaba yabwiye umunyamakuru ko ahabwa 10000 by'amayero, usibye aya ikipe ya Prix Decouvertes imutegurira ibitaramo 30 mu bihugu binyuranye bya Afurika ndetse n'igitaramo kimwe gikomeye akorera mu Bufaransa .
Yvan Buravan nyuma yo kwegukana iki gihembo yabwiye abakunzi be ko bagomba kwitabira igitaramo cye cyo kumurika Album ye ya mbere yise 'Love Lab' iki kikaba ari igitaramo kizaba tariki 1 Ukuboza 2018 muri Camp Kigali, akaba yatangaje ko ageze kure imyiteguro y'iki gitaramo cye.
Eng
RSS 
TANGA IGITECYEREZO