Mu minsi ishize ni bwo twabagejejeho inkuru y’umutekamutwe wibasiye ibyamamare ababeshya ko agiye kubaha akazi mu Bwongereza akabasaba ibyangombwa byabo ngo abashakire Visa, nyuma ibyo byangombwa akabikoresha yigarurira imbuga nkoranyambaga bakoresha agatekera imitwe inshuti zabo.
Byatangiye uyu mugabo yiyita Joseph Kayitera yandikira abahanzi banyuranye abamenyesha ko ahagarariye imyidagaduro muri Diaspora yo mu Bwongereza bityo akaba ashaka kubaha akazi ko kujya gutaramira Abanyarwanda baba mu Bwongereza, benshi bumvaga nta kibazo kirimo batangira kumvikana amafaranga, gusa ni umugabo utarakunze kugorana ku bijyanye n’amafaranga kuko ayo bamusabaga yose yayatangaga.
Ku ikubitiro uyu mutekamutwe yahereye ku byamamare bizwi aho twavugamo; Muyoboke Alex,Bruce Melody, Ama G The Black, Jay Polly, Charly na Nina ndetse na Nkusi Arthur aba bose imbuga nkoranyambaga zabo zikaba zaragabweho ibitero zimwe muri zo uyu mutekamutwe aranazegukana azifashisha mu guteka imitwe asabiriza amafaranga abeshya abantu ko nyiri ubwite yahuye n’ibibazo.
Rwasa ni we utahiwe mu bari kwibasirwa
Usibye aba ariko uyu mutekamutwe magongo aya yageze no muri Filime aho yaje guhindura izina noneho yiyita Yves yandikira uwitwa Rwasa nkuko yamamaye mu ma filime yo mu Rwanda amusaba ko yazitabira iserukiramuco ry’ama filime nyarwanda avuga ko ryagombaga kubera i Stamford h’i London tariki 25 Ugushyingo 2017. Atangiye kumusaba ibyangombwa amubeshya ko agiye kumushakira visa, Rwasa yahise yibuka inkuru z’ubutekamutwe Inyarwanda yakoze bityo ahitamo kubaza umunyamakuru asanga koko nimero bavuganaga ari iya wa mutekamutwe wamaze gutahurwa, bityo iby’iyo gahunda birangira bityo.
Knowless na Tom Close bo bararye bari menge
Nkuko yabigenje bwa mbere uyu mutekamutwe yabajije Rwasa niba yamuha numero za Tom Close ndetse na Knowless cyane ko ari bo ngo yifuzaga gukoresha mu gutekera imitwe icyakora kuko yari yamaze gutahurwa nimero zabo ntabwo yigeze azibona cyane ko iyo abonye nimero z’umuhanzi amusaba kuba bakorana kugeza amukuyeho ibyangombwa bituma yegukana imbuga nkoranyambaga uwo muhanzi cyangwa undi muntu w’icyamamare akoresha.
Tom Close na Knowless bararye bari menge ni bo uyu mutekamutwe ahigiye gutekera imitwe
Nyuma yo gutwara ibyangombwa by’aba bantu b’ibyamamare, uyu mugabo agerageza kubikoresha yigarurira imbuga nkoranyambaga bakoresha agahinduranya ama passwords azigize yarangiza kuzigarurira agatangira kwandikira abantu banyuranye abasaba amafaranga abamenyesha ibibazo binyuranye gusa akoresheje amazina n’imyirondoro yaba nyiri izi mbuga nkoranyanyambaga cyane cyane facebook.
Mu minsi ishize Muyoboke Alex yari yabwiye Inyarwanda.com ko bamaze gutanga ikirego barega uyu mugabo kugeza ubu ntakirakorwa kuri uyu mutekamutwe. Icyakora Rwasa nawe yamaze kubwira Inyarwanda.com ko nawe agiye kugeza ikirego muri Polisi mu rwego rwo gushakisha uyu mutekamutwe akaba yatabwa muri yombi.
DORE IKIGANIRO UYU MUTEKAMUTWE YAGIRANYE NA RWASA:
Eng
RSS 
TANGA IGITECYEREZO