Umuhanzi Gisa cy’Inganzo yongeye gutabwa muri yombi azira ibiyobyabwenge

Amakuru agera ku Inyarwanda.com ni uko Gisa cy’Inganzo yatawe muri yombi ku wa kabiri tariki 24 Ukwakira 2017 ahita ajyanwa kuri sitasiyo ya polisi ya Nyarugenge. Kuri uyu wa mbere tariki 30 Ukwakira 2017 umunyamakuru wa Inyarwanda yageze ku rukiko rw’ibanze rwa Nyarugenge aho uyu muhanzi yari yagiye kwitaba cyokora ntibyakunda ko tumuvugisha cyane ko akiri kubazwa ku byaha akurikiranyweho.

Amakuru make yatangwaga kuri uyu muhanzi ni uko ari mu maboko ya polisi  aho akurikiranyweho icyaha cyo gukoresha ibiyobyabwenge ndetse akaba yatangiye kubazwa kugira ngo akorerwe dosiye igezwe mu rukiko akurikiranwe ku byaha aregwa. Biramutse bibaye impamo uyu muhanzi agahamwa n’iki cyaha cyane ko atari ubwa mbere afashwe akurikiranyweho iki cyaha yaba akurikiye P Fla uherutse gufungwa ndetse igihano cye akaba ari kukiganisha ku musozo.

Gisa cy'Inganzo

Gisa cy’Inganzo ni umuhanzi w’umunyarwanda wamamaye mu ndirimbo zinyuranye zanakunzwe ariko kuri ubu imyitwarire ye ikaba kimwe mu byakomye mu nkokora iterambere rye.