KIGALI: Hagiye kubera igitaramo gikomeye ‘Fragrance worship’ kizahuriramo itsinda EXO, Fortrand, Olivier Cheuwa na Gaby Kamanzi

Nkuko Inyarwanda.com yabitangarijwe na Benjamin Musoni umwe mu bayobozi ba Moriah Entertainment group, iki gitaramo ‘Fragrance worship’ kigiye kuba ku nshuro ya mbere kibera hano mu Rwanda, cyateguwe n’umuramyi mpuzamahanga Fortrand Bigirimana ufite inkomoko mu Burundi, agitegura ku bufatanye na Moriah Entertainment.

Muri iki gitaramo ‘Fragrance worship’ kigiye kubera i Kigali, biteganyijwe ko Fortrand Bigirimana wamamaye mu ndirimbo ‘Ntaco nzoba’ ,azafatanya na Chris & Laura bagize itsinda EXO ryamamaye ku isi mu muziki wa Gospel by’umwihariko ku bantu bakunda indirimbo za Gospel ziri mu rurimi rw’igifaransa,Olivier Cheuwa wo muri Busuwisi na Gaby Kamanzi wo mu Rwanda. Intego y’iki gitaramo ngo ukugeza ububyutse mu karere k’Afrika y’iburasirazuba binyuze mu kuramya no guhimbaza Imana.

Fortrand Bigirimana wateguye iki gitaramo

Kwinjira muri iki gitaramo ni 5000Frw mu myanya isanzwe ndetse na 10,000Frw muri VIP. Iki gitramo kizatangira saa kumi n’ebyiri z’umugoroba kibere muri CLA Nyarutarama. Groupe EXO na Olivier Cheuwa bagiye gukirera igitaramo mu mujyi wa Kigali nyuma yo kuva i Burundi mu gitaramo nk’iki cyo kuramya no guhimbaza Imana. Kuri uyu wa mbere tariki 10 Nyakanga 2017 biteganyijwe ko ari bwo Olivier Cheuwa na Groupe EXO bazagera i Kigali.

Olivier Cheuwa ategerejwe i Kigali

Groupe EXO igiye gukorera igitaramo i Kigali

Gaby Kamanzi na we azaririmba muri iki gitaramo