Umusore w’umunyarwanda Ntawirema Celestin watangije igikorwa cya ‘Rwanda Cultural Fashion Show’, yatsindiye amadorali y’Amerika ibihumbi bine (4000$), ni ukuvuga asaga 3,340,000 y’amanyarwanda, anemererwa gusura imwe muri kompanyi zikomeye zitunganya filime i Hollywood ya Paramount Pictures.
Ni nyuma y’urugendoshuri rushingiye ku muco n’amateka amazemo iminsi muri Leta Zunze Ubumwe za Amerika ku butumire bwa Global Business Education Seminar. Ntawirema aganira na Inyarwanda yagize ati:
Natumiwe nyuma y’uko abategura Global Business Education Seminar babonye ko mfite ibikorwa byiza, mu bihugu 30, harimo 10 byo muri Africa. Icyari kigamijwe ni uguhuza abantu bakora ibikorwa bizamura abantu benshi ariko bakaba banashingira ku mateka y’ibihugu byabo ndetse n’amateka y’isi muri rusange.
Yakomeje agira ati “Ni muri urwo rwego baduha urugendoshuri hanyuma bakanaduha ibazwa hagamijwe kureba abitwaye neza. Nitwaye neza nsindira $4000 mbona n’itike yo kujya muri Paramount i Hollywood.”
Ntawirema arimo aragirira urugendoshuri muri Leta Zunze Ubumwe za Amerika
Ntawirema yadutangarije ko babajijwe ibibazo bitandukanye by’ubumenyi rusange by’ibanze ahanini ku ntambara ya mbere n’iya kabiri y’isi yose, maze abyitwaramo neza abifashijwemo no gukunda gukurikirana no kureba filime mbarankuru(film documantaire).
Ntawirema hamwe n'itsinda bari kumwe bagize ibihe byiza
Tuganira ku mugoroba wo kuri iki Cyumweru tariki ya 04/06/2017, Ntawirema Celestin yatubwiye ko kuri uyu wa Mbere ari bwo bagomba kuva i New York bakerekeza California. Ati “Ubwo rero ejo tuzava New York twerekeza California gukomeza ingendo zishingiye ku mateka n’umuco muri iriya leta ari naho nzajya muri Hollywood.”
Ntawirema Celestin ni umusore ufite imyaka 33 y’amavuko, mu mwaka wa 2012 akaba aribwo yatangiye igikorwa cya Rwanda Cultural Fashion Show agamije kuzamura ibijyanye n’imideri mu Rwanda abinyujije muri kompanyi ye ya IRIS PRO-FILMS 1000 Hills isanzwe ikora ibijyanye na filimi mbarankuru, gufotora no gutegura ibirori.
Amafoto ya Ntawirema mu bihe bitandukanye muri uru rugendoshuri
Aha yari yasuye 'Empire State Building', imwe mu mazu maremare cyane aherereye mu mujyi wa New York, yatashwe mu 1931, ikaba ifite amagorofa 102
Yanasuye inzu ndangamurage y'amateka kamere y'abanyamerika
Ishusho y'amahoro y'i New York nayo yayifatiyeho agafoto nka hamwe mu hantu hakomeye cyane mu mateka y'abanyamerika
Hamwe n'itsinda bari kumwe
Iki ni cyo gihembo yahawe n'abahoze ari ingabo z'abanyamerika zirwanira mu mazi nyuma yo gusubiza neza ibibazo yabajijwe ku ntambara ya mbere n'iya kabiri y'isi yose
Eng
RSS 
TANGA IGITECYEREZO