Mu mujyi wa Houston muri Leta ya Texas ho muri Leta Zunze Ubumwe za Amerika ni ho Polisi yabonye umurambo w’umusore witwa Byiringiro Mupenzi, uyu akaba yasanzwe iruhande rw’imodoka ye yamaze gushiramo umwuka. Polisi yo muri iyi leta ivuga ko igikomeje iperereza,ni yo yahamije amakuru inemeza iby’urupfu rw’uyu musore.
Iyi nkuru dukesha ikinyamakuru cya Abc13.com ivuga ibi byago byabaye mu ijoro ryo ku cyumweru tariki 28 Gicurasi 2017 ahagana saa munani z'ijoro rishyira ku wa mbere mu gitondo, aho umusore witwa Manar Al Quraishi wumvise uyu musore atabaza ngo yakinguye umuryango agasanga nyakwigendera muri parikingi yishwe urw'agashinyaguro dore ko ngo bari bamwambitse ubusa ndetse bamukomerekeje bikomeye ku ijosi agahita atabaza polisi. Mu mashusho agaragara kuri uru rubuga, uyu musore watanze aya makuru, yahamije ko byanze bikunze ari icyuma bakebesheje nyakwigendera.
Benshi mubamuzi bashenguwe no gupfa kwe
Ibinyamakuru bigaruka ku rupfu rwa Byiringiro Mupenzi
Polisi yo muri iyi leta yo yemeje ko abateye nyakwigendera bashobora kuba bamusanze mu modoka ye bagendeye ku maraso babonye kuri umwe mu miryango y’imodoka ye. Iyi modoka ikaba yahise ijyanwa kuri Polisi mu rwego rwo gukurikirana ibimenyetso byatuma bamenya uwivuganye Byiringiro Mupenzi.
Umuvandimwe wa Nyakwigendera Nganizi Kashima yabwiye iki kinyamakuru ko uyu musore yabanaga neza na buri wese, iki ngo ni cyo cyamuteye urujijo k'uwaba yishe nyakwigendera, uyu musore w’imyaka 25 iki kinyamakuru cyavuze ko yari amaze imyaka 4 yibera muri Leta Zunze Ubumwe za Amerika aho yari yaragiye gushakishiriza imibereho.
Polisi yahageze itangira iperereza
Umuvandimwe we Nganizi yababajwe bikomeye n'urupfu rw'umuvandimwe we
Abazi neza uyu musore bahamirije umunyamakuru wa Inyarwanda.com ko ari umunyarwanda nubwo iki kinyamakuru cyanditse ko inkomoko ye ari muri Congo, ibi kandi byahamijwe na zimwe mu nshuti ze zamwifurizaga kuruhukira mu mahoro mu Kinyarwanda cyimbitse banatangaza ko babajwe no kumva urupfu rw’uyu musore. Nyakwigendera Byiringiro Mupenzi yari asanzwe azwi nka Byiringiro Charles ku mbuga nkoranyambaga yakoreshaga ndetse bamwe mu nshuti ze bakaba bavuga ari na yo mazina ye nyakuri.
Eng
RSS 
TANGA IGITECYEREZO