RFL
Kigali

Uganda: Umukandida-Perezida Robert Kyagulanyi uzwi nka Bobi Wine yarekuwe atanze ihazabu

Yanditswe na: Mbarubukeye Etienne Peacemaker
Taliki:21/11/2020 11:45
0

Gutabwa muri yombi kwa Bobi Wine kwateje ibibazo ku bamushyigkiye 28 bahise bicwa naho abagera kuri 500 batabwa muri yombi. Urukiko rwo mu Burasirazuba bwa Uganda rwategetse ko arekurwa atanze ihazabu nk'uko tubikesha itangazamakuru ryo muri Uganda.



Bobi Wine yatawe muri yombi ku wa gatatu w'iki cyumweru ari muri mitingi yo kwiyamamaza, ashinjwa kurenga ku mabwiriza yo kwirinda coronavirus abuza guterana kw'abantu mu kivunge. Mu rukiko, Bobi Wine yagaragaye arimo kwiyumvira cyane ubwo yari ateze amatwi ibirego yari arimo gusomerwa.


Imiryango iharanira uburenganzira bwa muntu ivuga ko ibi birego ari urwitwazo rwa leta rwo kwibasira abatavuga rumwe nayo

Nyuma y'iminsi ibiri afunze, abamwunganira bashyize bemererwa kubonana na we.

Yarezwe kurenga ku mabwiriza y'urwego rw'ubuvuzi, icyaha gihanishwa igifungo cy'imyaka igera kuri irindwi. Inyubako y'urukiko yari izengurutswe n'abashinzwe umutekano bitwaje intwaro nyinshi. Yarekuwe by'agateganyo ariko nabwo atanze ihazabu.

Mu rukiko Bobi Wine yari yumiwe aho yavuze ko ari umucakara mu gihugu cye

Mbere yaho kuri uyu wa gatanu, igisirikare cya Uganda cyavuze ko kigiye kongera abasirikare mu nkengero y'umurwa mukuru Kampala ndetse no mu mijyi yindi ikomeye yo mu gihugu. Ni abo guhangana n'imyigaragambyo yadutse mu ntangiriro y'iki cyumweru yamagana ifatwa rya Bobi Wine.

Abigaragambya batatanyijwe no guterwa imyuka iryana mu maso, ndetse hamwe na hamwe baraswamo amasasu nyamasasu. Polisi yavuze ko abantu 28 ari bo bapfiriye muri iyo myigaragambyo ku wa gatatu no ku wa kane, naho abarenga 500 batawe muri yombi. Ibiro ntaramakuru AP byasubiyemo amagambo y'abantu babiri bo mu rwego rw'ubuvuzi rwa polisi bavuga ko kugeza ku wa kane mu gitondo abapfuye bari 37.

Amatora ya Perezida muri Uganda azaba ku itariki ya 14 y'ukwezi kwa mbere mu 2021, ariko ibyumweru bya mbere by'ibikorwa byo kwiyamamaza byamaze kurangwa n'urugomo rwinshi. Umunyamuziki    Bobi Wine, w'imyaka 38, ni umwe mu bakandida-Perezida 11 barimo guhatana na Perezida Yoweri Museveni umaze imyaka 34 ku butegetsi.

INKURU WASOMA: Dore abahanzi bashyize hasi mikoro bakajya mu buyobozi mu karere u Rwanda ruherereyemo






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND