RFL
Kigali

Ingabire Pascaline wamamaye nka Samantha agiye gusohora indi filime

Yanditswe na: Janvier Iyamuremye
Taliki:12/11/2020 11:48
0

Ingabire Pascaline wamenyekanye nka Samantha muri filime nyarwanda, agiye gusohora filime ye ya kabiri yise ‘Selfish Tv Series’, igaragaza ko amakosa akorwa n’ababyeyi agira ingaruka zikomeye ku bana.



Filime ‘Selfish TV Series’ yatunganyijwe n’ikigo Mass Kom Ltd ari nacyo gitunganya filime ‘Inzozi’ ya Ingabire Pascaline igeze ku gice (Season) cya kabiri ku gace (episode) ka kabiri. 

‘Inzozi’ ni imwe muri filime zica kuri shene ya Youtube zikunzwe muri iki gihe. Irebwa n’umubare munini wihebeye ubutumwa buyigize.

Biri no mu byatumye Ingabire yiyemeza gukora filime yindi y’uruhererekane yise ‘Selfish’. Ishingiye ku nkuru y’umuryango, cyo kimwe na filime ‘Inzozi’ uyu mukinnyi yahereyeho anakinamo.

Yabwiye INYARWANDA, ko filime ye nshya yise ‘Selfish’ igaragaza ko ihangana ry’ababyeyi rigira ingaruka zikomeye ku bo babyaye.

Uyu mukinnyi wa filime avuga ko yatekereje gusohora filime ya kabiri bitewe n’ukuntu iya mbere yakiriwe, anagira ngo agaragaze ingaruka zigera ku bana bitewe n’amakosa y’ababyeyi babo, bakora mu bihe bitandukanye.

Avuga ko iyi filime yanditswe ishingiye ku bisanzwe bibaho mu buzima bwa buri munsi. Ni filime avuga ko agiye gutegura mu gihe ari no gusohora iyitwa ‘Inzozi Series’.

Ati “Yego! Nibyo ngiye kuyikora mfite n’indi yitwa ‘Inzozi Series’ impamvu n'uko inama zose cyangwa ubutumwa bwose twifuza gutanga bwose butanyura muri filime imwe. Niyo mpamvu tugiye gukora indi.”

Ingabire avuga ko buri mukinnyi wese azakoresha muri iyi filime azamukura mu bo azatoranya mu gikorwa kizaba ku wa 15 Ugushyingo 2020. Yanditswe na Kamanzi Felix ari nawe wanditse filime ‘Inzozi Series’.

Abakinnyi muri iyi filime ni abahungu n’abakobwa bari hagati y’imyaka 17 na 20 y’amavuko. Abagore n’abagabo bafite imyaka iri hagati ya 40 na 50 ndetse n’abakecuru bafite guhera ku myaka 65 kuzamura.

Iki gikorwa cyo guhitamo aba bakinnyi kizaba, guhera saa tatu kugeza saa kumi nimwe; bizabera Nyamirambo kuri Heat Land Hotel.

Filime ye yise ‘Inzozi’ igaragaramo abakinnyi b’imena nka Mama Nick uzwi muri City Maid, Kamanzi Didier [Max], Ingabire Pascaline [Samantha], Usanase Bahavu Janet na Digidigi wo muri Papa Sava.

Hari kandi Ndimbati [Papa Sava], Mama Michou uzwi muri filime ‘Rwasa’, Nick [City Maid], Kirenga Saphine [Kantwengwa muri Seburikoko], Madederi [Papa Sava] n’abandi.

Iyi filime yegukanye igihembo mu bihembo bya Rwanda International Movie Awards, byatangiwe muri Kigali Convention Center ku wa 08 Werurwe 2020.

Umukinnyi wa filime Ingabire wamamaye nka Samantha agiye gusohora filime nshya yise 'Selfish TV Series' guhera mu 2021





TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND