RFL
Kigali

Intego yacu ni ugushaka amanota 6 kuri Cape Vert - Haruna Niyonzima

Yanditswe na: SAFARI Garcon
Taliki:11/11/2020 10:36
0

Kapiteni w'ikipe y'igihugu Amavubi, Haruna Niyonzima, yatangaje ko intego abakinnyi ndetse n'abatoza bafite ari ugushaka amanota atandatu ku mikino ibiri bagomba gukina na Cape Vert mu gushaka itike y'igikombe cya Afurika CAN 2021, ashimangira ko batazemera gutsindwa umukino n'umwe.



Nyuma y'umunsi wa mbere w'imyitozo Amavubi yakoreye muri Cape Vert, Kapiteni w'ikipe y'igihugu Haruna Niyonzima, yongeye gushimangira ko batazemera gutsindwa umukino n'umwe mu mikino ibiri bazakina n'iki gihugu, ahubwo intego yabo ari amanota atandatu, ariko bahera kuri atatu y'i Praia.

Yagize ati "Turashimira Imana ko turangije imyitozo ya mbere amahoro ntawufite imvune, muri rusange twiteguye neza, umwuka ni mwiza muri Camp, turashaka amanota atandatu kuri iyi mikino yombi, ntituzemera gutsindwa umukino n'umwe, ariko turahera ku manota atatu ya mbere hano muri Cape Vert".

Amavubi yageze muri Cape Vert ku wa mbere, aho yitegura umukino ubanza uzayahuza na Cape Vert kuri uyu wa Kane tariki ya 12 Ugushyingo 2020 i Praia.

Amavubi arashaka amanota atatu ya mbere muri iyi mikino yo gushaka itike ya CAN 2021, nyuma yo gutsindwa imikino ibiri ya mbere yo mu itsinda yakinwe mu 2019.

U Rwanda rurasabwa byibura amanota 4 muri iyi mikino ibiri ruzakina na Cape Vert, kugira ngo rugaruke muri kuruse yo guhatanira iyi tike ya CAN 2021 izabera muri Cameroun mu 2022. 

Haruna afite icyizere ko bazatanga ibyishimo ku banyarwanda mu mikino ibiri bagiye gukina na Cape Vert                        





TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND