RFL
Kigali

Imbamutima za Sessegnon wagaragarijwe urukundo na bagenzi be nyuma yo gukorerwa irondaruhu

Yanditswe na: SAFARI Garcon
Taliki:6/11/2020 16:53
0

Umwongereza ufite inkomoko muri Benin, Ryan Sessegnon, ukinira ikipe ya Hoffenheim yo mu Budage, yashimiye bagenzi be bakinana ku kimenyetso bagaragaje cy'ubufatanye no kumushyigikira mu kurwanya irondaruhu n'ivangura, mu mukino iyi kipe yo mu Budage yari imaze kunyagira Slovan Liberec 5-0 muri Europa league.



Ku wa mbere w'iki cyumweru, binyuze ku mbuga nkoranyambaga, Sessegnon yakiriye ubutumwa bwuzuyemo irondaruhu n'ivangura.

Mu mukino wa Europa League wakinwe ku wa kane tariki ya 05 Ugushyingo 2020, Sessegnon uri gukina muri Hoffenheim nk'intizanyo ya Tottenham, yari ku ntebe y'abasimbura iminota 90 yose y'umukino.

Gusa ibi ntibyabujije abakinnyi bari mu kibuga kugaragaza ko batishimiye irondaruhu ryakorewe Sessegnon mu ntangiriro z'iki cyumweru, nyuma yuko Munas Dabbur atsinze igitego cya mbere cya Hoffenheim, abakinnyi b'iyi kipe bose bazamura ibipfunsi byabo hejuru bagaragaza ko bamaganye irondaruhu n'ivangura ryakorewe mugenzi wabo Ryan sessegnon.

Nyuma y'umukino, Sessegnon yafashe ifoto y'aba bakinnyi bamanitse ibipfunsi byabo hejuru, ayishyira ku mbuga nkoranyambaga ze, anandikaho ati:"Basore banjye" akurikizaho ikimenyetso cy'umutima ndetse n'ibipfunsi bitatu "Ubwuzuzanye"!

Ikipe ye ya Tottenham Hotspurs yahise isubiza ubutumwa yatanze, igira iti: "Turagushyigikiye Ryan".

Sessegnon ushobora gukina ku mpande, nyuma yo kubona ubu butumwa bw'irondaruhu, yatangaje ko ibi bitakimutungura gusa biteye agahinda.

Rutahizamu wa Manchester City Raheem Sterling, mu kwezi gushize yasabye ubuyobozi bwa ruhago ndetse n'abanyirimbuga nkoranyambaga gushyiraho uburyo bagenzura bakavumbura abakorera amabi arimo n'ivangura ku mbuga nkoranyambaga.

Mu igenzura ryakozwe ku bakinnyi bakina muri shampiyona y'u bwongereza, byibura 43% bakorewe irondaruhu n'ivangura binyuze ku mbuga nkoranyambaga.

Nyuma yo gutsinda igitego, Abakinnyi ba Hoffenheim bazamuye igipfunsi hejuru bagaragaza ko bashyigikiye Sessegnon mu kurwanya ivangura

Tottenham yagaragaje ko ishyigikiye umukinnyi wayo Ryan Sessegnon





TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND