El Clasico 2020: Sergio Ramos yagarutse mu kibuga, Ter Stegen ntazakina! Amakuru avugwa mu makipe mbere y'umukino

Uyu mukino uteganyijwe kuri uyu wa Gatandatu, uzatangira saa Kumi zuzuye (16h00') ukazabera i Camp Nou ku kibuga cya FC Barcelona. Ni umukino amakipe yombi agiye gukina afite ikibazo cy'umusaruro muke kuko yombi yatsinzwe imikino aheruka gukina muri shampiyona ya Espagne La Liga.

Real Madrid yatsindiwe mu rugo n’ikipe yazamutse uyu mwaka ya Cádiz ku gitego 1-0, mu gihe FC Barcelone yatsinzwe na Getafe na yo igitego 1-0, ijya ku mwanya wa Cyenda n'amanota arindwi mu mikino ine.

Real Madrid yo iri ku mwanya wa gatatu n’amanota 10, ariko ifite umukino irusha mukeba wayo.

Uyu mukino ugiye gukinwa rutahizamu ufatwa nka nimero ya mbere ku Isi, Lionel Messi atameze neza, nyuma yo gushaka gusohoka muri iyi kipe bikanga mu mpeshyi yuyu mwaka, amaze gukinira FC Barcelona imikino ine akaba yaratsinzemo igitego 1 gusa, anatanga umupira 1 wavuyemo igitego. Mu mikino itatu iheruka muri shampiyona ya Espagne, Messi ntiyigeze atsinda igitego.

Barcelona kandi izakina uyu mukino idafite umunyezamu wayo nimero ya mbere, Marc-Andre Ter Stegen utarakina umukino n'umwe muri uyu mwaka w'imikino kubera imvune. Gusa umutoza Koeman azaba afite myugariro Samuel Umtiti na Jordi Alba bazaba bagarutse mu kibuga.

Ku ruhande rwa Real Madrid, amakuru meza ni uko myugariro akanaba kapiteni w'iyi kipe, Sergio Ramos wari wagize imvune ku mukino Real madrid yatsinzwe na Cadiz 1-0, ubu yamaze kugaruka mu kibuga akaba ejo yarakoze imyitozo ku giti cye, akaba azagaragara muri uyu mukino.

Zinedine Zidane kandi azaba afite Daniel Carvajal na Alvaro Odriozola bari bamaze igihe batagaragara mu kibuga kubera imvune.

Gusa ariko ntabwo Real Madrid izaba ifite mukinnyi wo hagati ufasha ba rutahizamu, Martin Odegaard, wavunikiye mu ikipe y’igihugu cye cya Norvège, akaba ashobora kuzamara hagati y’ibyumweru bibiri cyangwa bitatu ari hanze y'ikibuga.

Mu bazaba bari mu kibuga, Sergio Ramos niwe umaze guca agahigo ko gukina imikino myinshi ya El Clásico kurusha abandi, kuko amaze gukina imikino  46, mu gihe Messi umukurikiye amaze gukina 43.

Aya makipe yombi amaze guhura inshuro 244 mu mikino y’amarushanwa atandukanye, buri imwe yatsinzemo 96. Ariko iyo ubaze iya La Liga gusa, Real Madrid ni yo imaze gutsinda  imikino myinshi  kuko yatsinze 73, mu gihe Barcelona yatsinze 72.

Umukino wa El Clasico ni umwe mu yikurikirwa na benshi ku Isi

Ramos yagarutse mu myitozo yitegura umukino wa El Clasico

Hitezwe guhangana kwa Messi na Ramos muri El Clasico