RFL
Kigali

Cristiano wasanzwemo Coronavirus ku nshuro ya kabiri ntazakina umukino wa FC Barcelona ya Messi

Yanditswe na: SAFARI Garcon
Taliki:22/10/2020 16:59
0

Rutahizamu ukomoka muri Portugal, ukinira ikipe ya Juventus de Turin, Cristiano Ronaldo, ntazakina umukino w'umunsi wa kabiri muri UEFA Champions League, Juventus izakina na FC Barcelona uteganyijwe mu cyumweru gitaha, nyuma yo gupimwa ku nshuro ya kabiri bakamusangamo Coronavirus.



Tariki ya 13 Ukwakira 2020, ni bwo byatangajwe ko Cristiano yishyize mu kato nyuma yo gusangwamo Coronavirus. Icyo gihe yasize bagenzi be mu mwiherero w'ikipe y'igihugu ya Portugal yarimo yitegura umukino wa UEFA Nations League.

Mu bipimo byafashwe ku nshuro ya kabiri byagaragaje ko Cristiano Ronaldo utarigeze ugaragaza ikimenyetso na kimwe cya COVID-19, atarakira, akirwaye.

Ibi byahise bigira ingaruka mbi kuri Juventus ndetse na Cristiano ubwe, kuko atazagaragara ku mukino wa kabiri muri UEFA Champions League mu matsinda, uteganyijwe ku wa Gatatu w'icyumweru gitaha.

Mu mategeko UEFA yasohoye, yavuze ko umukinnyi wari urwaye COVID-19, azemererwa kugaruka mu kibuga mu gihe yapimwe bagasanga ari muzima mbere y'iminsi 7. 

Bivuze ko amahirwe yo kongera kubona Messi na Cristiano bahanganye mu cyumweru gitaha, yayoyotse ubwo hatangazwaga ko Cristiano akirwaye COVID-19.

Cristiano Ronaldo ntiyari bwahure na Messi mu mikino y'amatsinda muri Champions League, bahuye inshuro eshatu mu mikino yo gukuranwamo.

Mu mwaka w'imikino wa 2007/08, Cristiano akinira Manchester United yahuye na Messi akinira Barcelona, icyo gihe United isezerera Barcelona muri 1/2, mu mwaka ukurikiyeho Barcelona yatsindiye Manchester united ku mukino wa nyuma, mu gihe mu mwaka w'imikino wa 2010/11 Real Madrid yahuye na Barcelona muri 1/2.

Cristiano kandi ntazagaragara ku mukino wa shampiyona y'u Butaliyani, Juventus izahuramo na Genoa ku cyumweru.

Cristiano ukirwaye Coronavirus ntazakina umukino wa FC Barcelona

Cristiano uzasiba imikino itandukanye azagaruka mu kibuga yakize COVID-19

Benshi banyotewe kongera kubona guhangana kwa Messi na Cristiano






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND