RFL
Kigali

Kenya: Minisitiri w’Ubuzima Mutahi yatangaje ko indirimbo ‘Jerusalema’ iri gutuma benshi barenga ku mabwiriza yo kwirinda Covid-19

Yanditswe na: Janvier Iyamuremye
Taliki:20/10/2020 9:34
0

Minisitiri w’Ubuzima muri Kenya, Bwana Mutahi Kagwe yatangaje ko atewe impungenge no kuba indirimbo ‘Jerusalema’ ifite igikundiro cyihariye, iri gutuma abantu barenga ku mabwiriza y’inzego z’ubuzima yo kwirinda icyorezo cya Covid-19 kibasiye Isi muri iki gihe.



Minisitiri Mutahi yavuze ko abantu mu ngeri zitandukanye bari kujya mu tubari, utubyiniro n’ahandi habera ibikorwa by’imyidagaduro bakabyina indirimbo ‘Jerusalema’ mu cyiswe ‘Jerusalema dance challenge’ ntibubahirize ingamba zo kwirinda Covid-19.      

Igihiriri cy’abantu bifata amashusho babyina indirimbo ‘Jerusalema’ cyiyongereye kuva mu gihe cya Guma muru Rugo no muri iki gihe Isi ikomeje guhangana n’icyorezo cya Covid-19 kimaze kwandura abarenga Miliyoni 40 ku Isi.

Mu kiganiro n’itangazamakuru cyo ku Cyumweru tariki 18 Ukwakira 2020, Minisitiri Kagwe yavuze ko nta muntu ubujijwe kubyina iyi ndirimbo, ariko kandi ngo agomba kubikora yubahiriza amabwiriza yo guhana intera mu rwego rwo kwirinda Covid-19 n’ibindi.

Biteganyijwe ko abagize Inteko Ishinga Amategeko ya Kenya, kuri uyu wa kabiri tariki 20 Ukwakira 2020, basohora amashusho babyina iyi ndirimbo ‘Jerusalema’ ya Master KG wo muri Afurika y’Epfo.   

Ku Cyumweru, Kenya yatangaje ko abantu 685 banduye Covid-19 n’aho 616 bayanduye ku wa Gatandatu. Ni mu gihe iki gihugu giherutse gufungura utubari, amashuri n’insengero.

Abantu 44,881 bamaze kwandura Covid-19 muri Kenya n’aho 832 yarabishe. Ni mu gihe ku Isi yose abarenga miliyoni 40 banduye iki cyorezo, abarenga miliyoni bishwe na Covid-19 n’aho abarenga miliyoni 27 barakize.

Indirimbo ‘Jerusalema’ yashyizwe ku rubuga rwa Youtube, ku wa 12 Ukuboza 2020. Ni iya Master KG yakoranye na Nomcebo Zikode, ndetse iri kuri Album yitwa ‘Jerusalema’.

Iri mu rurimi rw’iki-Zulu, yanditswe n’abarimo Kgaoglelo na Nomcebo Zikode. Ni imwe mu ndirimbo zitarama umwaka zisohotse zabaye isereri mu mitwe ya benshi, zirabyinwa karahava!

Imaze guca uduhigo dutandukanye ku Isi, ndetse Master KG avuga ko atari aziko Imana yayisize amavuta mbere y’uko isohoka. Ikundwa na benshi bitewe n’umudiho wayo n’ubutumwa buyigize.

Yashyizwe kuri Youtube n’abantu batandukanye, aho imaze kurebwa n’umubare munini igeze kuri Miliyoni 194. Iyi ndirimbo iri mu zikunzwe iri no ku rutonde rw’izihagazeho muri Amerika, u Busuwisi, U Bufaransa, Canada n’ahandi.

Minisitiri w'Ubuzima Bwana Mutahi yatangaje ko indirimbo 'Jerusalema' iri gutuma benshi barenga ku mabwiriza yo kwirinda Covid-19

Umuhanzi Master KG na Nomcebo bakoranye indirimbo 'Jerusalema' yabaye idarapo ry'umuziki we

KANDA HANO UREBE AMASHUSHO Y'INDIIRMBO 'JERUSALEMA' YA MASTER KG NA NOMCEBO






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND