RFL
Kigali

Giroud yaciye agahigo mu ikipe y'igihugu y' u Bufaransa nyuma y'ibitego bibiri yatsinze Ukraine

Yanditswe na: SAFARI Garcon
Taliki:8/10/2020 11:12
0


Rutahizamu w'ikipe ya Chelsea n'ikipe y'ikipe y'igihugu y'u Bufaransa, Olivier Giroud, yaciye agahigo ko kuba umukinnyi wa kabiri umaze gutsinda ibitego byinshi mu ikipe y'igihugu nyuma y'ibitego 2 yatsinze mu bitego 7-1 u Bufaransa bwatsinze Ukraine mu mukino wa gicuti.



Giroud w'imyaka 34 y'amavuko yatsinze ibitego bibiri mu gice cya mbere cy'umukino, ahita yuzuza ibitego 42, anyura kuri Michel Platini wari ku mwanya wa kabiri, asatira Thierry Henry umurusha ibitego 9.
Giroud wakinaga umukino we 100, yatsinze ibitego bibiri ahita yuzuza ibitego 42, anyura kuri Michel Platini ufite ibitego 41.
Thierry Henry niwe uyoboye abandi mu gutsindira ikipe y'igihugu y'u Bufaransa ibitego byinshi, kuko yatsinze ibitego 51, kuri ubu ni umutoza muri Leta Zunze ubumwe za Amerika.
Giroud ukunda kugirirwa icyizere n'umutoza Didier Deschamps, afite intego yo kuzasoza umupira w'amaguru ariwe ufite agahigo ko gutsindira ikipe y'igihugu y'u Bufaransa ibitego byinshi.
Muri uyu mukino kandi Eduardo Camavinga w'imyaka 17 y'amavuko, yanditse amateka yo kuba umukinnyi wa kabiri ukiri muto utsindiye u Bufaransa, nyuma y'igitego yatsinze Ukraine cyafunguye amazamu ku munota wa 9 w'umukino.
Camavinga wakinaga umukino we wa mbere mu ikipe nkuru y'u Bufaransa yabaye umukinnyi wa kabiri ukiri muto utsindiye u Bufaransa nyuma y'imyaka 106 bikozwe na Maurice Gastiger.
Maurice yatsinze igitego ku mukino u Bufaransa bwakinaga n'u Busuwisi mu 1914, icyo gihe yari afite imyaka 17 n'amezi 5, Camavinga akaba yatsinze igitego ku mukino wa Ukraine afite imyaka 17 n'amezi 11.

Ibitego 7 by'u Bufaransa byabonetse kuri uyu mukino byatsinzwe na Edouardo Camavinga wafunguye amazamu, Giroud atsinda 2, Vitaliy yitsinze igitego, Griezman, Mbappe Tolisso batsinda kimwe.

Giroud yatsinze ibitego cya bibiri aba umukinnyi wa kabiri umaze gutsindira u Bufaransa ibitego byinshi

Camavinga yabaye umukinnyi wa kabiri ukiri muto utsindiye ikipe y'igihugu y'u Bufaransa






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND