RFL
Kigali

Itariki nk'iyi mu myaka 43 ishize umunyabigwi Pele yasezeye burundu kuri ruhago! Azibukirwa kuki?

Yanditswe na: SAFARI Garcon
Taliki:1/10/2020 12:17
0


Edson Arantes do Nascimento uzwi cyane ku izina rya Pelé, benshi muri iki gihe izina rye barizi "nk'umwami w'umupira w'amaguru" afatwa nk'umwami wa ruhago w'ibihe byose, ibyahise n'ibizaza, ariko abamubonye awuconga si benshi cyane.



Itariki nk'iyi ukwezi nk'uku mu 1977 nibwo Pele yakinnye umukino we wa nyuma nk'umukinnyi wabigize umwuga.

Mu gihe yakinaga yari icyamamare bikomeye, ndetse yamaze igihe runaka ari we mukinnyi uhembwa amafaranga menshi kurusha abandi bose muri siporo zose ku isi.

Afite umuhigo wemejwe na Guinness World Records ko yatsinze ibitego 1,281 mu mikino 1,363 yemewe yakinnye.

Yari rutahizamu w'ubuhanga butangaje, rimwe na rimwe akanasubira inyuma agakina hagati afasha abasatira kubera ubuhanga yari afite mu gucenga no gutanga umupira aho ashatse.

Pelé, ubu ni umukambwe w'imyaka 79. Agishoboye, yakiniye amakipe abiri gusa by'umwuga, Santos y'iwabo yakiniye imyaka 18, na New York Cosmos muri Amerika yakiniye imyaka ibiri.

Ku wa gatandatu tariki 01/10/1977 kuri stade ya New York Cosmos habereye umukino wa nyuma wo gusezera kuri Pelé wari uhagaritse ruhago ku myaka 37, wahuje Cosmos na Santos.

Ni umukino wari wahuruje abantu benshi cyane, barimo se n'umugore we, ndetse n'icyamamare mu iteramakofe Muhammad Ali ntiyari yatanzwe.

Igice cya mbere cy'uyu mukino yagikinnye mu ikipe ya Cosmos, igice cya kabiri agikina ari muri Santos. Umukino warangiye Cosmos itsinze Santos 2 -1.

Muri uwo mukino, igitego Pelé yatsindiye Cosmos kuri 'coup-franc' yatereye mu ntambwe 27, ni cyo gitego cya nyuma yatsinze nk'umukinnyi wabigize umwuga.

Muri uwo mukino, mu gice cya kabiri imvura yaraguye, bituma ibinyamakuru byo muri Brazil bivuga ko "n'ikirere cyagize agahinda kirarira".

Pelé ubu ari iwabo mu zabukuru aho amaze igihe yugarijwe n'indwara ziva ku ntege nke z'umubiri.

Mu ntangiriro z'uyu mwaka yavuze ko yababajwe cyane no kuba atakibasha kwigenza, ariko ko "nta kundi ari ibisanzwe ku bageze mu myaka ye".

Tariki 23 z'uku kwezi kwa  10, Pele azuzuza imyaka 80 y'amavuko.

Pele afatwa nk'umukinnyi wa mbere w'ibihe byose muri ruhago


Pele yafashije Brazil kweguana igikombe cy'Isi

Muri iyi minsi ntabwo ubuzima bwa Pele buhagaze neza

Tags:




TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND