Kenya: Nyuma y'amezi 6 utubari twafunguwe naho amashuri akomeza gufungwa

Mu gihe benshi bari kwibaza uko bizagenda niba ubucuruzi bw'agasembuye bukomeje guhagarara mu bice bitandukanye by’Isi hari n’abandi bibaza uko bizagenda mu gihe amashuli yazakomeza gufunga? Kuri iyi nshuro igihugu cya Kenya cyafunguye utubari gusa amasaha yo gucuruza aragabanwa.

                     Hoteli iri mu zigezweho i Nairobi (Panari)

Abacuruzi bagomba kuzajya bafunga saa yine z'ijoro zaho, ni ukuvuga saa tatu z'ijoro ku isaha yo mu Rwanda no mu Burundi. Ibi byatangajwe na Perezida Uhuru Kenyatta ku munsi w'ejo ku wa Mbere, ubwo yagezaga ijambo ku baturage ku ngamba za leta zo gukomeza guhangana n'icyorezo cya coronavirus.

Bijyanye n'amasaha mashya y'umukwabu, ubu abaturage bagomba kuba bageze mu ngo zabo saa tanu z'ijoro (aho kuba saa tatu z'ijoro zari zisanzweho), bakahava bitari mbere ya saa kumi za mu gitondo. Izi mpinduka zatangiye kubahirizwa kuri uyu wa kabiri. Ibyari byitezwe byo kongera gufungura amashuri ntibyabaye.

Minisitiri w'uburezi yari yategetse abarimu kongera gusubira ku mashuri ku wa mbere, ariko Perezida Kenyatta yavuze ko amashuri yakongera gufungura ari uko gusa umutekano w'abanyeshuri wamaze kwizerwa. Bwana Kenyatta yagize ati: "Niba twaratsinze urugamba rumwe kuri Covid-19, ntabwo turatsinda intambara".

       

              Bwana Uhuru Kenyatta peresida wa Kenya  

Kugeza ubu muri Kenya hamaze gutangazwa abantu barenga 38,000 banduye coronavirus, muri bo abarenga 700 imaze kubica. Hashize ibyumweru umubare w'abandura coronavirus muri Kenya ukomeza kugabanuka, ariko impuguke mu buvuzi zivuga ko ikigero cy'ibipimo kiri hasi.

Utubari two muri Kenya twari twafunzwe mu kwezi kwa Gatatu nk'imwe mu ngamba zo kwirinda ikwirakwira ry'ubwandu bwa coronavirus. Ariko za 'restaurants' zo zari zakomeje gutanga inzoga ku bakiliya kugeza ibyo nabyo bihagaritswe mu kwezi kwa Karindwi.

Src: BBC