Imyigaragambyo muri Amerika itewe no gushaka gufungura amashuri

Mu bigo birenga 35 mu ntara zitandukanye za Leta Zunze Ubumwe za Amerika, abarimo babyo ku wambere batangije  imyigaragambyo irwanya ifungurwa ry’ amashuri, mu gihe hakigaragara ubwiyongere bw’ icyorezo cya covid-19.

Icyo aba barezi basaba ni uko uburyo bwo kwigisha bwari bumenyerewe butakoreshwa, bitewe n’ uko hatari ingamba zihagije zo kwirinda, ndetse ko kwirinda bishobora no kugorana bitewe n’ ubuto bw’ ishuri. 

Abarimu bagaragaza ko hakwiye kubaho uburyo bwo gupima ku bigo, hagashyirwa abajyanama bahuguriwe ibya covid-19, n’ abaganga.

Mu kwerekana uburemere bw’ ikibazo, Ishyirahamwe ry’ Abarimu rya Milwaukee, ryerekanye bamwe mu bigaragambyaga bakoze amabuye ashyirwa ku mva, yanditseho ati, “Dore aha haryamye abanyeshuri bo mu mashuri abanza bo muri Green Bay, banduye covid-19 ku ishuri”, bakomeza bati “Ruhukira mu mahoro (RIP) nyogokuru wanduye covid-19 arimo afasha abuzukuru gukora umukoro wo mu rugo”.

Uretse kuba aba barimu barwanya ifungurwa ry’amashuri mu buryo busanzwe, baranasaba ko hatangwa imfashanyo y’amafaranga akwiye kuba afasha ababyeyi bayakeneye ngo babone ibikenerwa by’ibanze.

Bamwe mu babyeyi ba Georgia bakoze imyigaragambyo bashyigikiye ko abanyeshuri basubira kwiga ku mashuri bisanzwe, baguye mu kantu ubwo abakozi 260 b’ ikigo muri ako karere bapimwe bagasangwamo covid-19. Ntabwo abandura covid-19 ari abarimu ndetse n’ abakoze b’ ibyo bigo gusa, kuko n’ abanyeshuri bagiye bandura covid-19.

Dr. Anthony Fauci ku wambere yatangaje ko abanyeshuri bakwiye gusubira kwiga mu buryo busanzwe kubera impamvu 2 zikomeye. Avuga ko abanyeshuri bakeneye Ubuzima bwo mu mutwe, ndetse n’ inyungu z’ indyo yuzuye. Impamvu ya kabiri ikaba ko byafasha ababyeyi nabo gushyira ku murongo gahunda zabo, ahanini z’ imirimo.

Leta Zunze Ubumwe za Amerika, ikaba imaze gutangaza abanduye barenga miliyoni 4, ndetse hakaba harapfuyemo abarenga ibihumbi 155 nk’ uko bitangazwa n’ imibare ya Kaminuza ya Johns Hopkins. Muri rusange, ku Isi abarenga miliyoni 18.2 baranduye, naho 693,700 bishwe n’ iki cyorezo (covid-19).

Src: Johns Hopkins University, CNN, Aljazeera, New York Times