Airtel Rwanda
Kigali

Chorale Christus Regnat, Arsene Tuyi, Platini mu bafite indirimbo zihatanira ibihembo bya MNI

Yanditswe na: Janvier Iyamuremye
Taliki:7/07/2020 9:09
0

Abahanzi bigenga 22 na Chorale Christus Regnat yo muri Kiliziya Gatolika bari guhatanira ibihembo mu cyiciro cya Gatatu cy'irushanwa rya MNI binyuze mu itora ryo kuri Internet rizamara amezi atatu.



Aba bahanzi barimo ab’amazina azwi n’abakizamuka bari guhatana muri ibi bihembo bya MNI bigiye gutangwa ku nshuro ya Gatatu.  

Iri tora ryo kuri Internet ryatangiye ku wa 01 Nyakanga rizasozwa ku wa 30 Nzeri 2020 ari nabwo hazamenyakana batatu ba mbere bazashyikirizwa amafaranga.

Bari mu gutorwa mu gihe hashize igihe gito hasojwe icyiciro cya Kabiri cyegukanwe n’umuhanzikazi Tonzi abicyesha indirimbo ye yise ‘Hejuru ya byose’, aho azahembwa Miliyoni 2 Frw

Yakurikiwe n’umuhanzikazi Mutimawurugo Claire wabaye uwa kabiri abicyesha indirimbo ye yitwa ‘Umunyenga w’intsinzi’ yasohoye mu 2017, we azahembwa ibihumbi 700 Frw.

Bryan Lead yabaye uwa Gatatu abicyesha indirimbo ‘Open My Eyes’, aho azahembwa ibihumbi 300 Frw.

Mu cyiciro cya Gatatu cy’iki bihembo bya MNI, umuhanzi mu ndirimbo zo kuramya no guhimbaza Imana, Arsene Tuyi ari imbere mu majwi mu itora ryo kuri Internet rikorerwa ku rubuga rwa MNI.

Arsene Tuyi ufite indirimbo “Naranyuzwe” ihatanye afite amajwi 2123; Manzi Maurice ni we uwa kabiri aho afite indirimbo “Warampinduye” igejeje amajwi 1193.

Isharah Alliance ni uwa Gatatu mu majwi aho afite indirimbo “Ubumuntu” ifite amajwi 1238. Chorale Christus Regnat iri ku mwanya wa Kane n’amajwi 532 icyesha indirimbo “Mama shenge” bakoranye na Yverry ndetse na Andy Bumuntu.

Ku mwanya wa Gatanu hari itsinda rya Juda Muzika rifite amajwi 555 ricyesha indirimbo “Nailingi Yo”. Ni mu gihe ku mwanya wa nyuma hari umuhanzi Crezo G utarabona ijwi nta rimwe.

Dj Pius uherutse gusohora indirimbo “Ubushyuhe” yakoranye na Bruce Melodie ari ku mwanya wa 17 n’amajwi 64. Ni mu gihe Platini Nemeye ukunzwe mu ndirimbo “Veronika” inahataniye igihembo ari ku mwanya wa 7 n’amajwi 668.

Urubuga rwa MNI rwashyizweho umwaka ushize hagamijwe guteza imbere abahanzi Nyarwanda binyuze mu itorwa ry’indirimbo zabo zikunzwe bigizwemo uruhare n’abafana batora bifashishije Internet.

Gutora inshuro imwe bingana n'amafaranga 50 Frw yishyura akoresheje telefoni akanze *611#. Abahanzi bemerewe gukomeza kohereza indirimbo zabo kugeza igihe itora rizarangirira.


INDIRIMBO "NARANYUZWE" YA ARSENE TUYI IRI IMBERE MU MAJWI

">

INDIRIMBO "MAMA SHENGE" YA CHORALE CHRISTUS REGNAT, YVERRY NA ANDY BUMUNTU IHATANIYE IBIHEMBO

">

'VERONIKA' YA PLATINI [P] NAYO IHATANYE MU IRUSHANWA RYA MNI

">







TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND