Ibirori byo kwishimira igikombe kuri Liverpool byahungabanyijwe n'akaga yahuriye nako ku kibuga cya mukeba yatwaye iki gikombe, Manchester City, umutoza wayo Pep Guardiola atangaza ko Liverpool itari yaje ku kibuga cyabo kubishima hejuru.
Mu cyumweru gishize, Liverpool yegukanye igikombe cya shampiyona mu myaka 30 ishize ubwo Man City yanganyaga na Chelsea, ariko igarutse mu kibuga mu ijoro ryakeye irahababarira.
Mu ijoro ryo kuri uyu wa Kane tariki 02 Nyakanga 2020, Liverpool yabanje guhabwa icyubahiro na Manchester City mbere y'umukino wabereye Etihad Stadium ariko umukino ntiyawuboneyemo icyubahiro.
Manchester City yayoboye umukino kuva rugikubita ndetse itsinda ibitego bitatu mu gice cya mbere cy'umukino.
Umubiligi Kevin de Bruyne yafunguye amazamu ya Liverpool kuri penaliti nyuma y'uko Raheem Sterling agushijwe mu rubuga rw'amahina, ndetse Raheem nyuma gato yungamo icya kabiri.
Umukinnyi wo hagati ukiri muto Phil Foden nawe yagaragaje ko afite imbere heza atsinda icya gatatu mbere gato y'uko igice cya mbere kirangira.
Man. City yatsinze igitego cya kane mu gice cya kabiri ubwo Alex Oxlade-Chamberlain wa Liverpool yanyereje umupira ukajya mu izamu ry'ikipe ye nyuma y'igitutu cya Raheem Sterling.
Man. City niyo yegukanye shampiyona ebyiri ziheruka, irusha inota rimwe Liverpool muya 2018-19, ariko ubu ikaba yararushijwe cyane na Liverpool.
Ni inshuro ya gatatu gusa mu myaka 11 y'imikino ishize umutoza Pep Guardiola adatwara igikombe cy'aho ari gutoza yaba muri City, muri Barcelona cyangwa muri Bayern Munich.
Umukino wo mu ijoro ryo kuwa kane, wari witezwe cyane mu Bwongereza ariko warangiye nta nkuru kuri Liverpool ndetse City itanze ubutumwa ko umwaka utaha ishobora kuzaba ikaze.
De Bruyne yerekanye ko ari umukinnyi guhagarika bitorosye kubera amacenga no kunyaruka, Phil Foden nawe yerekana ko ashobora kuba umusimbura mwiza wa David Silva uri gusohoka muri City.
Riyad Mahrez winjiye asimbuye nawe yari aziko atsinze icya gatanu n'umutwe ariko umusifuzi aracyanga nyuma yo kubaza video assistant referee (VAR) ikamwereka ko yabanje gukora umupira n'akaboko.
Umutoza wa Man City Pep Guardiola yagize ati: "Ndishimye. Ndashima ikipe yanjye, twatsinze ikipe ya mbere n'uburyo ikomeye.
"Nabonye icyubahiro twabahaye uburyo bari bishimye. Amasura yabo yerekana ko ari aba mbere koko.
"[Ariko] Ntibari baje hano kutwishima hejuru. Banyoye inzoga nyinshi barangije baza hano guhatana.
"Ibyo rero byaduhaye amahirwe yo kubakubita 4-0, byari ingenzi cyane kandi kuri twe mu gihe twitegura Arsenal na Real Madrid".
Umutoza wa Liverpool Jurgen Klopp yabwiye Sky Sports ati: "Mu mutwe, banyarukaga kuturusha. Twananiwe guhindura ibintu.
"Iyo ukina na Man City uba ufite ibibazo bikomeye. Twagize amahirwe ariko ntitwayabyaza umusaruro. Ibivuyemo rero turabyakiriye".
Klopp avuga ko batari bashyize ibitekerezo byose kuri uyu mukino ariko ko ikipe ye ntako itagize kuko yakinaga n'ikipe ikomeye kandi babashije gutwara igikombe.
"Man City irakomeye. Nabonye uko bakinnye uyu mwaka, ntabwo bakinnye umukino mubi".
Liverpool yakomewe amashyi na Manchester City
Manchester City yandagaje Liverpool iherutse kuyitwara igikombe
Kevin De Bryunegaje muri uyu mukino
Eng
RSS 
TANGA IGITECYEREZO