Itsinda ry'Abanyamerika ryasubiyemo indirimbo y'umunyarwanda Mugabe Assiel wigisha muri Kaminuza, yakuyemo isomo-VIDEO

Worship team yo mu itorero rya New Hope Free Methodist Church ryo muri New York, USA mu mujyi wa Rochester ni yo yasubiyemo indirimbo 'Witinya' ya Mugabe Assiel. 'Witinya' (Don't let it go) yashyizwe mu Cyongereza na Andrew Cashner iririmbwa/isubirwamo mu buryo bwa 'Cover' n'itsinda ry'abaramyi bo muri Leta Zunze Ubumwe za Amerika. Banahise bayikorera amashusho bafashe bakoresheje ikoranabuhanga mu kwirinda Covid-19.

Itsinda ry'abanyamerika ryasubiyemo indirimbo y'umuhanzi nyarwanda

Mu kiganiro na INYARWANDA, Mugabe Assiel yadutangarije uko byagenze ngo iri tsinda ry'abanyamerika rimenye indirimbo ye, uko yakiriye kuba indirimbo ye yarakorewe 'Cover' n'abanyamerika ndetse n'icyo bisobanuye ku muziki nyarwanda. Yavuze ko iyi 'Worship team' yasubiyemo indirimbo ye bataziranye, ahubwo bakaba barahujwe n'umwe muri bo, ati "Ntabwo twari tuziranye nka team. Uwo twari tuziranye ni umucuranzi wabo (yitwa Randy) wa guitar". 

Mugabe usengera muri Methodiste Libre yakomeje avuga ko bamusabye uburenganzira bwo kuyisubiramo bakazajya bayikoresha mu rusengero rwabo mu gihe cy'amateraniro. Ati "Twamenyanye na we yaje mu Rwanda mu 2017, agaruka mu 2019 dukorana concert mu kwa 9, maze yumvise iyi ndirimbo arayikunda cyane, ambaza niba bazajya bayikoresha mu rusengero rwabo ndabimwemerera; ambwira ko bazakora version yayo y'icyongereza". 

Randy yageze muri Amerika ahuza Worship team asanzwe abarizwamo na Mugabe Assiel, ni bwo baje gusaba uyu muhanzi nyarwanda ko basubiramo indirimbo ye 'Witinya' yanditswe mu 2009 nyuma yo kuyikundishwa ba mugenzi wabo. Ati "Yageze muri Amerija ahita ampuza na ririya tsinda, mu kwezi gutaha bongera kunsaba gukora record yayo ndabemerera; maze umwe muri bo witwa Andrew Cashner akora coordination yo kubikora kuriya yasohotse".

Assiel Mugabe yaratangaye bimuha umukoro wo gukora cyane!

Nyuma y'uko aba baririmbyi b'abanyamerika basubiyemo indirimbo ye, Mugabe Assiel yabwiye InyaRwanda.com ko byamushimishije cyane, biramutangaza binamusigira umukoro wo gukora cyane. Yavuze ko byamuhaye umukoro wo gukora izindi ndirimbo nziza kurushaho. Ati "Nkibona product narishimye cyane ndanatangara numva hari indi ntambwe nteye mu muziki; uretse no kuba barayikoze byahise binampa umukoro wo gukora izindi nziza kurushaho".

Assiel Mugabe asanga urwego rw'imyumvire ruri hejuru mu bihugu byateye imbere

Akomeza avuga ko byamweretse ko umuziki nyarwanda wo kuramya no guhimbaza Imana uri gutera imbere ariko kandi abawukora bakaba badakwiriye kwirara ahubwo bakwiriye gukora cyane kandi bagakora ibyiza bizakundwa cyane na benshi bazabibona. Ati "Ibi byanyeretse ko umuziki wa Gospel mu Rwanda uri gutera imbere, ariko binanyereka ko tunagomba gukora indirimbo nziza, n'umunyamahanga yakwifuza gucuranga no kuririmba".

Ati "Ikindi ni uko byanyeretse urwego rw'imyumvire iri hejuru ya biriya bihugu byateye imbere, aho akubona agahita avumbura ikikurimo kandi akakibyaza umusaruro, kandi yicishije bugufi". Avuga ko ibi bikwiriye gutanga isomo ku bahanzi nyarwanda bagashyigikirana buri umwe akishimira iterambere rya mugenzi we. Ati "Ibi byatanga isomo ku bahanzi guca bugufi no kunezererwa ibyiza mugenzi wawe yakoze ukumva ko ari ishema ryawe".

Mugabe Assiel arasaba abahanzi nyarwanda gushyigikirana buri umwe akishimira ibyiza mugenzi we yakoze

REBA HANO 'WITINYA' YA ASSIEL MUGABE YASUBIWEMO N'ABANYAMERIKA

REBA HANO 'URI UMWAMI WANJYE' YA MUGABE ASSIEL