RFL
Kigali

Rusizi: Imirenge 4 igize umujyi wa Kamembe yasubijwe muri gahunda ya 'Guma Mu Rugo' mu kwirinda Coronavirus

Yanditswe na: Mupende Gedeon Ndayishimiye
Taliki:4/06/2020 13:35
0


Imirenge 4 yo mu karere ka Rusizi igize umujyi wa Kamembe yasubijwe muri gahunda ya 'Guma mu Rugo' mu kwirinda ikwirakwira ry'icyorezo cya Covid-19 nk'uko byatangajwe na Prof Shyaka Anastase Minisitiri w'Ubutegetsi bw'igihugu.



Kuri uyu wa Kane tariki 4 Kamena 2020 Minisitiri w'Ubutegetsi bw'Igihugu yasohoye itangazo rivuga ku mabwiriza yo gukumira ikwirakwira rya Coronavirus mu karere ka Rusizi. Imyanzuro ikubiye muri aya mabwiriza, yafashwe hagendewe ku byemezo by'Inama y'Abaminisitiri yo kuwa 2 Kamena 2020 byahagaritse ingendo zo kujya no kuva mu turere twa Rusizi na Rubavu. Hashingiwe kandi ku busesenguzi bw'inzego z'ubuzima ku cyorezo cya Coronavirus mu karere ka Rusizi.

Minisitiri w'Ubutegetsi bw'Igihugu, Prof Shyaka Anastase mu itangazo yateyeho umukono, ashingiye kuri izo ngingo tuvuze haruguru, yatangaje ko imirenge ine yo muri Rusizi ishyizwe muri gahunda ya Guma mu rugo. Ati "Guhera uyu munsi Umujyi wa Kamembe, ni ukuvuga Imirenge ya Kamembe, Nyakarenzo, Mururu n'igice cya Gihundwe, ushyizwe muri gahunda ya 'Guma Mu Rugo' (Lockdown) izamara nibura ibyumweru bibiri".

Prof Shyaka yavuze ko abakozi ba Leta n'abikorera bose basabwa gukorera akazi mu rugo, keretse abatanga serivisi za ngombwa. Amasoko, amaduka inzu zo kwiyogoshesherezamo, amagaraje, ibinamba, ubwubatsi bw'inzu, birafunze, keretse ahacururizwa ibiribwa, ibikoresho by'isuku, farumasi, lisansi na mazutu, n'ibindi bikoresho by'ibanze. 


Prof Shyaka Anastase Minisitiri w'Ubutegetsi bw'Igihugu

Resitora n'amahoteli byemerewe gukoresha abakozi bake kandi bagatanga serivisi yo guha amafunguro abakiriya bakayatahana (Take away). Yavuze ko ingendo zose zitari ngombwa zihagaritswe, kandi ko gusohoka mu rugo nta mpamvu zikomeye nabyo bibujijwe. Ingendo hagati y'ahashyizwe muri gahunda ya Guma mu rugo n'ibindi bice by'akarere ka Rusizi zirabujijwe, keretse ku bajya kwivuza cyangwa abafite impamvu zihutirwa. Ubwikorezi bw'ibicuruzwa bwo bugomba gukomeza. 

Prof Shyaka Anastase yasabye inzego zibishinzwe gukomeza kugenzura ko hari n'ahandi hashobora gushyirwa muri Guma mu rugo mu gihe bibaye ngombwa. Inzego z'ibanze n'iz'umutekano zasabwe kurikikirana ishyirwa mu bikorwa ry'aya mabwiriza. Aya mabwiriza afashwe nyuma yuko muri Rusizi hakomeje kugaragara ubwandu bwa Coronavirus ari nayo mpamvu yatumye ingendo za moto muri aka karere n'ingendo ziva ndetse n'izijya mu turere twa Rusizi na Rubavu zihagarikwa n'Inama y'Abamanisitiri iherutse kuba.


Rusizi yasubijwe muri Guma Mu Rugo mu kwirinda Covid-19






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND