Ingendo hagati y’Intara n’Umujyi wa Kigali hamwe na moto zitwara abagenzi biracyabujijwe

Itangazo ryaturutse mu Biro bya Minisitiri w'Intebe rikanyuzwa ku rubuga rwa Twitter, rivuga ko izi ngendo zikibujijwe bitewe n'isesengura ryakozwe. Rivuga ko uyu mwanzuro wafashwe mu rwego rwo kurengera ubuzima bw'abaturage. Risoza rivuga ko ingamba nshya zo kurwanya icyorezo cya Coronavirus, zizatangazwa n'Inama y'Abaminisitiri izaterana kuwa 2 Kamena 2020.

Iryo tangazo riragira riti "Nyuma y’isesengura, ingendo hagati y’intara zitandukanye, hagati y’intara n’Umujyi wa Kigali hamwe na moto zitwara abagenzi biracyabujijwe mu rwego rwo kurengera ubuzima bw’abaturage. Ingamba nshya zo kurwanya Covid-19 zizatangazwa n’Inama y’Abaminisitiri yo ku wa 2 Kamena 2020".

Ibi bitangajwe mu gihe u Rwanda rumaze gutangaza umuntu umwe wishwe na Coronavirus nk'uko Minisiteri y'Ubuzima yabitangaje kuri uyu wa Gatandatu tariki 30/05/2020, uwo akaba yari umushoferi w'imyaka 65 wari utuye mu gihugu cy'abaturanyi wahisemo gutaha mu Rwanda nyuma yo kuremba. Yitaweho bishoboka ariko birangira iyi ndwara imuhitanye.

Umwanzuro wo gukomeza guhagarika izi ngendo ufashwe mu gihe mu Rwanda hakomeje kuboneka benshi bandura Covid-19 dore ko kuri iki Cyumweru tariki 31/05/2020 habonetse abantu 11 banduye, naho abakize akaba ari 6. Abarwayi bashya barimo abanyarwanda batashye, abatwara amakamyo n'abacuruzi bambukiranya imipaka.

Kuva iki cyorezo cyagera mu Rwanda kugeza magingo aya, abantu 370 ni bo bamaze kwandura, abakize ni 256, abakirwaye ni 113 naho umuntu umwe ni we wahitanywe n'iki cyorezo. Inzego zinyuranye za Leta zirasaba abaturarwanda bose gukomeza kubahiriza ingamba zashyizweho mu kwirinda iki cyorezo, bakaraba intoki kenshi, kwambara agapfukamunwa no guhana intera hagati y'umuntu n'undi.

Itangazo ryaturutse mu Biro bya Minisitiri w'Intebe ku mugoroba wo kuri iki Cyumweru