Airtel Rwanda
Kigali

Coranavirus: Kwizera amasengesho no kutumvira OMS biraganisha Tanzania mu kaga! Mu munsi umwe habonetse abarwayi 181

Yanditswe na: Eric Misigaro
Taliki:30/04/2020 10:35
0

Muri Afrika y’Uburasirazuba ubu Tanzania ni cyo gihugu gifite abantu benshi banduye coronavirus. Ku munsi w'ejo hatangajwe abantu 181 banduye iyi ndwara. Perezida Magufuri wa Tanzania yabanje gufata iki cyorezo nk'icyoroshye ndetse agaragara mu rusengero ari gusenga akajya anasaba abaturage gusenga ngo Imana izabarinda Covid-19.



Tanzania ni cyo gihugu kiyoboye ibindi byose mu kugira umubare mwinshi w'abarwaye Covid-19 muri Afrika y’Uburasirazuba. Ubu umubare w’abamaze kwandura iyi ndwara urangana na 480, abamaze gukira barangana na 167 naho abamaze guhitanwa nayo ni 16. Kuwa 29 Mata 2020 habonetse abantu bagera ku 181.

Uko umubare w'abanduye Covid-19 uhagaze muri Afrika y’Uburasirazuba

Ø  Tanzania: 480

Ø  Kenya: 384

Ø  Rwanda: 225

Ø  Uganda: 79

Ø  Burundi: 14

Bamwe bari kunga mu mugani w’ikinyarwanda ugira uti ”Nyamwanga kumva ntiyanze no kubona”. Hari undi mugani ugira uti “Akagabo gahimba akandi kataraza”. Ntabwo ari rimwe cyangwa kabiri Tanzania imaze gusabwa gufunga ibikorwa bihurirwamo n’abantu benshi ariko umukuru w’iki gihugu agakomeza gutsimbarara avuga ko ubukungu bw’igihugu bwahita budindira biturutse mu bikorwa byiganjemo iby’ubucuruzi ahanini biri mu murwa mukuru Dar es Salaam.

Ku bakomeje gusaba ko uyu mujyi ubamo abantu miliyoni esheshatu, wafungwa ubuzima busanzwe bugahagarikwa, Perezida Magufuli yavuze ko ibyo bidashoboka. Mu magambo ye yagize ati” …Ibyo ntibishoboka. Dar es Salaam ni ho hantu honyine hava imisoro y'igihugu cyacu…Hejuru ya 80% y'iyo misoro iva Dar es Salaam”.

Ese Tanzania yaba yaraburiwe na OMS/WHO ikanga kumva?

Imibare y'abanduye iri kuzamuka ubutitsa muri Tanzania nyuma y'uko ishami ry'Umuryango w'Abibumbye ryita ku buzima OMS/WHO ryaburiye leta kubera kudafata ingamba kare mu kwirinda iki cyorezo. Bijya kuzamba byatangiye Magufuli atangira kwizeza ibitangaza by’Imana abaturage ko izabarinda ndetse ko bakwiye gusenga bizeye.

Ku rundi ruhande, benshi banenze iki cyemezo cya Perezida Magufuli kuko gishobora kujyana mu kaga abaturage b'iki gihugu ndetse n’ibihugu bituranye nacyo dore ko ubu abashoferi b’amakamyo atwara ibiribwa bari mu bantu bari kuva muri iki gihugu bagasangwamo iyi ndwara bageze mu bihugu byabo.

Iki cyemezo cyafashwe cyo kugana insengero kuruta gukaza ingamba zo kwirinda gishobora kuzanira Tanzania ibibazo bikomeye kuko ishobora kwisama cyasandaye. Hari abatangiye gufata iki cyemezo nk'uko byabaye kuri Leta Zunze Ubumwe za Amerika kuko nayo yabanje gufata Coronavirus nk'ikintu cyoroheje ariko ubu iri kuzahara cyane.

Tariki 24/04/2020 Madamu Matshidiso Moeti uyobora OMS muri Tanzania yavuze ko bafite ubwoba bwinshi ko imibare y'abanduye coronavirus iziyongera muri iki gihugu. Yabwiye abanyamakuru ati: "Tubona neza ko kubuza abantu guhura ari benshi no guhagarika ibikorwa bihuriramo abantu benshi byatinze, dutekereza ko ibi ari byo biri gutuma tubona imibare yiyogera".

Mu minsi ishize, leta ya Tanzania yatangaje iminsi itatu yo gusengera iyi ndwara ngo irangire. Gusa ntiyabujije abantu guhurira mu nsengero, mu gihe guhura kw'abantu benshi bivugwa n'abahanga nk'inzira yo kwihuta kw'iki cyorezo. 

Zimwe mu ngamba zamaze gufatwa na Tanzania ndetse benshi bafata nk’izidahagije. Nubwo leta ya Tanzania itafashe ingamba zikomeye nk'izo mu bihugu bituranyi nka Uganda n'u Rwanda, hari ingamba zimwe yafashe mu bihe bishize zo kwirinda;

Ø  Amashuri yose yarahagaritswe

Ø  Ibitaramo bya muzika, imikino, n'ibiterane by'abantu benshi cyane bya politiki byarahagaritswe

Ø  Imodoka zitwara abantu muri rusange zibujijwe kuzuza abagenzi kandi abarimo bose bagomba kuba bicaye

Ø  Indege zitwara abagenzi zabujijwe kugwa muri Tanzania

Ø  Kuva kuwa mbere w'icyumweru gishize abantu bose bagiye mu kazi bategekwa kwambara udupfukamunwa bari ahari abandi.

Ø  Inzu zose z'uburiro muri Dar es Salaam zategetswe guha abantu ibiribwa bakabitwara ntibabirire muri izi nzu.

Src: worldometers.info, bbc.com






TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND